MNF in Zu zawrh leh tha ti lovin Zu zawrh thlâwptu zinga tel nia sawi chiang lehzuala puan an phut

MNF President Zoramthanga chuan MNF chuan Zu zawrh leh chu tha an ti lo tih sawiin, Zu zawrh thlâwptute zingah Kohhran rawngbawltute an tel nia sawi chu chiang lehzuala puan a phut thu a sawi bawk.

Niminpiah-a Mizo Hnam Run inkhawm-a thu a sawina ah MNF President Zoramthanga chuan Zonet chanchinthar April ni 15 chuan Zu khapna dan, ‘The Mizoram Liquor Prohibition Act 2019’ Zonet-in an zirchianna ah ‘Zu zawrh thlâwptute zingah Sawrkar hnathawk, Kohhran rawngbawltu leh khawtlang hruaitu engemawzat an tel nia a puang chu mak a tih hlê tih a sawi a. “Zonet hian Zu zawrh thlâwpna lam thu chanchhin thar ‘headline’ meuhah hmangin zu zawrh leh a nih theihna tur lam hawiin a zirchiangtu tur an intir niin a lang thei a. Zu chu zawrh a nih leh theihna tur ‘goal’-a khalhluh tumna ngar ngar leh hetiang hmalakna an rawn chhawpchhuak hi pawi ka ti a, Kohhran rawngbawltute sawi lan a ni phei hi chu a pawi takzet a ni,” a ti a. “Zonet hian tute nge an contact tih engmah an sawi lang lo a, Excise Department-a thawktu pakhat sawi dan tih te, mi thenkhat sawi dan tih te bakah, Kohhran hruaitute zînga miin Zu zawrh leh chu tha an ti, ni te in a puang a, hei hi MNF chuan kan ngai thutak hle a ni,” a ti bawk.

MNF President chuan, “Presbyterian Kohhran hruaitute hian Zu zawrh leh hi tha an ti dawn em ni? Mizoram Baptist Kohhran leh Kohhran dang hruaitute hian Zu zawrh hi tha an ti dawn em ni? Keini, MNF chuan Zu zawrh leh hi tha kan ti lo a, Zu zawrh chhûnga dik lo tak leh dan pangngailo taka thihna a thlen tam zia te kan hmufiah tawh. Kan tawrhna kha rapthlak kan ti a, mihring nunna thâp tur leh chhungkaw kehdarhna thlen turin Zu hi zawrh nawn leh chi-ah kan ruat lo,” a ti bawk.

Zu chungchangah hian MNF party chuan dinna a nei sa tih MNF thuchhuah chuan tarlangin, chuvangin Kohhran hruaitute pawh hian Zu zawrh leh hi tha an ti lo a nih chuan chiang taka an sawi nawn leh hi a pawimawh hle tih an tarlang a. Zu khapna dan ‘The Mizoram Liquor Prohibition Act 2019’ chu Mizo mipui, Kohhran hruaitute leh MNF Party duh dan anga siam a ni tih MNF thuchhuah chuan an tarlang bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man