Mizoram-ah a thlawna thisen pek sang hret; Nikum chhungin Unit 37,419 lak a ni
Mizoram State AIDS Control Society (MSACS), Mizoram State Blood Transfusion Council thawktute hnen atanga thudawn danin sawrkar kum kalta, April 2022 atanga March 2023 inkar chhung khan Mizoram pumah Thisen Unit 37,419 lak a niin heng zinga 34,252 chu mi tlawmngaite pek (voluntary) a ni a, mi tlawmngaite pek hi thisen lak zawng zawng atanga chhutin 91.54% a tling a ni. Nikum chhung vek khan Blood Bank hrang hrangte hian Voluntary Blood Donation Camp tum 589 huaihawtin heng Camp an neihna atanga thisen an lak zat chu Unit 23,508 a tling a ni.
MSACS-a thawktute chuan India rama a thlawna thisen pe tam zingah Mizoram chu a la awm zel tih sawiin, tunhma deuha a thlawna thisen pe percentage sang tak tak ni thin kha COVID-19 hrilen vang leh inkhuahkhirhna kalpui anih avangin a tlahniam deuh a, mahse tunhnai ah a sang zawngin a kal chho leh mek niin an sawi a. A thlawna thisen pek percentage hi kum 2020-21 ah 89.66%, kum 2021-22 ah 90.08% leh kum kalta ah 91.54% a tling a ni. Mizoram State AIDS Control Society thawktute chuan thisen chu mamawh dan a zira sawngbawl leh pek thin anih avangin indaih a harsa hle tih an sawi a, a thlawna thisen pe chhunzawm zel turin mipuite an sawm tih an sawi bawk.
Chhinchhiahna atanga a lan danin sawrkar kum liamta chhung khan District Hospital Serchhip Blood Bank chuan thisen Unit 960 dawngin heng zinga Unit 892 te chu Voluntary Blood Donation a ni a, Voluntary Blood Donation hi thisen an dawn zawng zawng atanga chhutin za zela 92.92 niin hemi hun chhung hian Blood Donation Camp tum 32 an buatsaih a, heng Camp an buatsaih atang hian thisen Unit 806 an la a, Unit 86 te chu mi tlawmngai ten mahni Blood Bank-ah kala thisen an pek te a ni thung. Tun tumah hian Serchhip Blood Bank aia Voluntary Donation tamna hi Blood Bank 5 a awm a ni.
Comments
Post a Comment