Taxation Department in Chhiah an hmuh tura bituk an khum lawmna hun an hmang

Mizoram sawrkar-a Taxation Department chuan kum 2022-2023 chhunga Sawrkar-in Chhiah an hmuh tur zat (target) a bituk an khum lawmna hun an Department Auditorium-ah hmangin Chief Minister Zoramthanga chuan a hmanpui a ni.

Taxation Department hi Mizoram Sawrkar tana Chhiah chhungluttu lian ber niin GST, VAT leh Professional Tax atangin Chhiah an lakhawm a. Financial Year 2022-2023 chhunga Chhiah an hmuh zawng zawng hi cheng vbc. 1020.66 a ni a. Revised Estimate-ah cheng vbc. 900 hmu tura beisei an nih laiin hei hi cheng vbc. 120.62 in an khum a. State's Own Tax Revenue (SOTR) target cheng vbc. 917.79 pawh cheng vbc. 102.87 in an khum a ni.

State's Own Tax Revenue (SOTR) mai bakah Taxation Department hian Central atanga thla tina Mizoram in Devolution of Taxes and Duties a hmuhah hian thawh sang tak a nei a. GST hman a nih hnu hian Tax Revenue hi Central GST leh State GST-ah inzahsem a ni a. Taxation Department hnuaia GST registration neite hian Chhiah an pekin CGST leh SGST hi 50-50 basis in an pe a. Hetah hian SGST bik hi Mizoram State Sawrkar sum bawmah a lut nghal a. CGST erawh hi chu Central Sawrkar sum bawmah Central Taxes leh Duties dangte nen a lutkhawm a. Heta tang hian Tax Devolution hi Mizoram Sawrkar-in a lo hmu ve leh thin a ni.

Nimin-a Taxation Department in he an hlawhtlinna an lawmna hunah hian Chief Minister Zoramthanga chuan Mizoram sawrkar sum dinhmun hriatthiam pawimawh a tih thu sawiin, Hun pangngai (normal period) chu ni se Budget system ang chuan State in hmasawnna hna awlsam taka thawh theih a nih laiin hripui leng avangin budget pawh a lo innghah vek tawhna State sum hmuh chu hrek a nih tak thu a sawi a. Sum hnar dang bakah sum hmuhna innghahna lian ber, Share of Taxes chu a tlakhniam tak vek avangin leh chu sum kan hloh chu tun thlenga rulhna hmuh let a awm loh avangin hripui leng boruak a ziaawm hnu ah pawh sum harsatna hi a la inzui zel thu a sawi a. Share of taxes tihhniam avanga kan hmuh tur awm kan hloh tak chu cheng vbc. 3000 aia a tam ngei a rinawm thu a sawi bawk.

He hun hi Commissioner of State Tax R. Zosiamliana chuan kahruaiin Khual zahawm Taxation Minister Lalchamliana leh Taxation Principal Secretary Vanlal Chhuanga te pawhin thu an sawi bawk a ni.