END Zu leh ruihhlo man sa tihchhiat a ni

Excise & Narcotics Department in tunhnaia ruihhlo leh Zu an man, Court lama thubuai chinfel tawh leh Dan anga tihral theih cheng vbc. 14 chuang man chu nimin khan Excise & Narcotics Department changtu Minister Er. Lalrinawma chuan Bethani Multipurpose Farm, Phunchawng-ah a halral.

Nimin-a heng ruihhlo halralna hunah hian Er. Lalrinawma chuan Zu leh Ruihhlo chi hrang hrangin min run mek tih sawiin, mipui leh Force-te an tanrual a pawimawh thu leh heng ruihhlo do chu mi tin mawhphurhna a ni tih hriat thar a tul thu a sawi bawk. Nimin-a he hun hman hi Excise & Narcotics Department Jt. Commissioner Z. Lalhmangaiha chuan kaihruaiin Principal Secretary Excise & Narcotics KT. Beicho leh Excise & Narcotics Department Commissioner Ngurchungnunga leh Deparment-a thawktute an tel a ni.

Nimin-a halral tak Zu leh ruihhlo te hi a vaiin Rs. 14,09,13,395/- hu niin Ruihhlo an halral te hi Heroin kg. 30.053 (Rs. 9,01,59,000 hu); Ganja Rs. 2,73,920 hu; Methamphetamine Rs. 3,91,30,560 hu; Alprasil Tablet Rs. 26,18,200 hu; Alprazolam Tablet Rs. 24,520 hu; Tramadol Tablet Rs.7,000 hu; Pseudoephedrine Tablet Rs. 49,21,660 hu; Dextropropoxyphene Capsule Rs. 735 hu leh Codein based cough syrup Rs. 14,250 te an ni a, a vaia belhkhawmin tualchhung rate-in Rs. 13,71,49,845 man a ni.

Zu an leihbuak te hi Sapzu (IMFL) Whisky (750 ml) um 2,397 - Rs 28,76,400 hu; IMFL Whisky (375 ml) um 90 - Rs. 54,000 hu; IMFL Whisky (180 ml) um 50 Rs. 15,000 hu; IMFL Rum (750 ml) um 501 Rs. 3,50,700 hu; IMFL Rum (375 ml) Bottle khat Rs. 350 hu; Beer (650 ml) Bottle 24 Rs 9,600 hu leh Canned Beer (500 ml) Can 1,525 Rs. 4,57,500 hu, a vaiin tualchhung rate a Rs. 37,63,550 man a ni.