Mizoram-a District 5 te Malaria umbo mai thei dinhmunah a ding tawh - Health Minister

/

Health Minister Dr. R. Lalthangliana chuan Mizoram chhunga Health Department hnuaia District then hran pakua zinga panga chu Malaria umbo mai thei dinhmunah a ding tawh tih a sawi.

Asia Pacific Leaders Conclave on Malaria Elimination chu nimin khan New Delhi-a Hyatt Regency-ah neih niin he hunah hian Malaria umbona kawngah Mizoram chu India ram chhunga State hnathawk tha berte zinga mi a nih avanga Mizoram in hma a lo lak tawh dan te sawilang tura beiseiin Health Minister Dr. R. Lalthangliana chu khual zahawm ni tura sawm a ni a. He hunah hian Health Minister chuan Mizoram chhunga Health Department hnuaia District thenhran pakua zinga panga (5) chu Malaria umbo mai thei dinhmunah a ding tawh tih sawiin, chutih rualin District pali - Lunglei, Lawngtlai, Mamit leh Siaha District-ah te chuan Malaria vei kum tinin an la awm thin thu leh hmasawnna chak zawk kan neih theih nan National Vector Borne Disease Control Programme (NVBDCP), New Delhi kaihhruaina hnuaiah Mizoram Sawrkar chuan hma chak takin a la mek tih a sawi a, a bikin Malaria tamna hmun District pali-ah chuan IRS (DDT kah), LLIN (Thosilen chiah sa) sem leh IEC/BCC activity hrang hrang, State leh District Task Force bakah NGO leh Kohhran pawl hrang hrang te nen tanghoin theihtawp chhuah a hmalakna kalpui mek a ni, a ti bawk.

Health Minister chuan Mizoram chu Malaria vei hmuhchhuah kawngah India ramchhung a thisen exam rate sang ber a nih thu leh Sub-Centre awmlohna khua-ah pawh khawtinah Malaria vei hmuhchhuah tuma hmalak a nih thin thu bakah Malaria veite enkawlna pek vek an nih thu te a sawi bawk.

‘Asia Pacific Leaders' Conclave on Malaria Elimination’ hi Ministry of Health & Family Welfare, Govt. of India leh Asia Pacific Leaders’ Malaria Alliance (APLMA) tangdunin an buatsaih niin Union Health Minister Dr.Mansukh Mandaviya kaihhruaina hnuaiah neih a ni a. He hunah hian Indonesia, Malaysia, Solomon Islands, Fiji, Cambodia, Sri Lanka, Nepal, Thailand, Myanmar leh State thenkhat atanga Minister leh Palai kalten thu an sawi a. WHO, Niti Aayog, ICMR leh khawvela Malaria do kawnga pawl lian tak tak te an tel a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »