Tanhril Setlak ram-a Tui lakna siam mek tlawh

Aizawl khawpui chawmna tura Tanhril Setlak ram-a Tui lakna, 'Augmentatio of Water Supply and Construction of 37 MLD Water Treatment Plant' siam mek chu Inrinni zing khan UD&PA Department changtu Deputy Chief Minister Tawnluia chuan a hmunah a tlawh.

Tanhril Setlak ram-a Tlawng tui Pump chhuahna tur hi UD&PA Department hnuaia SIPMIU hmalaknaa thawh mek niin zawhfel tep a ni a. He hna hi zawhfel a nih hunah chuan nitin tui litre maktaduai 37 a pump thei dawn a, Aizawl khawpui, a bikin Aizawl hmarlam Veng hrang hrangte chawm tura ruahman a ni. Aizawl Greater Water Supply Scheme Phase-I leh II hian ni tin tui litre maktaduai 28 atanga 34 bawr vel a pump chhuak thei a, tuna ruahmanna thar hi a taka hman a nih hunah chuan Aizawl khawpuiin tun aia a let hnih-a tam tui a hmu thei tawh dawn a, ram pum huapa mi pakhatin ni tin tui thianghlim a dawn tur zat bituk litre 135 hmu thei tura duan chu a takin a hlawhtling thei dawn a, kum 2033 thleng Aizawl khawpui tui mamawh a phuhru tura ngaih a ni.

He tuilakna tur siam mek a tlawhna ah hian Deputy Chief Minister chuan Tui hi pump theih a nih hunah pawh a semchhuahna lamah uluk taka hmalak zel a ngai tih a sawi a. 37 MLD Water Treatment Plant chu Aizawl mipuite nghahfak a ni tih sawiin, mipuite beisei ang taka tha leh chhawrtlak anih theih nan project khawihtu leh enkawltu SIPMIU leh Contractor-te chu uluk leh tha taka hnathawk chhunzawm zel turin a chah bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar