Hnam thuam a dahlau lo zawngin kalpui ni rawh se

Hnam thuam a dahlau lo zawngin kalpui ni rawh se

- C.Ramengmawia

India rama zirna ngaisang, ziak leh chhiar tamna State- Mizoram bakah India ram puma ziak leh chhiar thiam tam berna District Serchhip tia sawi kan ni a, hetianga sawi kan ni thin hi a lawmin, a tak pawhin ziak leh chhiar thiam tamna District kan ni tih hi a lang fo thin a ni.

Kumin zirna bul tan kumah sawrkar-in thuchhuah a siam angin sawrkar School zawng zawngte uniform in ang hman tawh tur a tih angin hman a ni ta a, hei hi a thata a remchan viau laiin, engemaw that lohna leh tul lohna riau a awm laiin, tute emaw hleihluak taka induhsakna kawng inhawn thei a ni bawk.

Chutih laiin, District danga Private School dinhmun erawh kan hmuh pui loh laiin, hman kumah Silchar- Bhagha ah khuan Mizo ten kan lo ngaihhlut em em ‘Thangchhuah puan’ hi School Uniform-ah vai hovin an lo hmang pek a. Ka hmuh phatin ka ngaihtuahna a thuiin, ‘Engtia tih chi nge ni ang aw?’ ka ti rilru rauh rauh a. A leh lamah tuna Chapchar Kut leh kan Mizo hunpui a lo herchhuah changa kan inbel kan Zo-zia lanna thuam tam zawk hi Vai hovin a than lian zawk leh tam zawkin min lo dahchhuah sak zawk reng a lo ni lawi si.....

Tuna kan hnam ziarang lanna thuam - Puanchei, Thangchhuah, Tawlhloh, Ngotekherh, Pawndum etc. te hi hnamdangin an neih ve hauh loh, a rawng thlak fuh em em mai; hnamdangte pawhin mawi leh nalh an tih piah lamah hetianga inthuamte chu ‘Mizo’ an ni maw min tih nghal theihna tura kan lo ‘Serh’ hran thin a nih lai mekin kumin hian khawilai Private School emawte chuan School Uniform-ah an rawn hmang ta mauh mai le!!

School Uniform piah lamah mi pangngai nia kan hmuh, lansarh duhtu ten ti danglamin a nihna piahlamah kekawr emaw, Pawnfen ah emaw, Jacket-ah emaw leh thil dangah kan suasam ta zel anih hi....

Hetianga School Uniform-a School thuneitu ten hman an duhna thinlung hi hnam ziarang chawilen an duhna pawh a ni thei a, amaherawh chu; heng kan Mizo thuamte hi hmanlai atangin SERH bik an ni a. Chawi lar kan tum lutukna lamah kan ti dahlau zawk thei em? A bikin, Thangchhuah puan/diar/kawr te hi Thangchhuahpa chauhvin a inbel theih thil a ni a. Chutiangin, Tawlhloh puan te pawh - Mi ding nghet te chauhvin an inbel tur thuam a ni a, Kawrcheite pawh chutiang zelin.....

Hmanlai nun kan kalsan tawh a, khatiang hunlai nen a in ang tawh lo kan ti a nih pawhin a mawh chuang lova, amaherawhchu, kan hnam ro thilte hi chu a nihna leh a inbelna hun leh hmunah hian inbel mai ila, chu chu hnam upa leh fing zawkte pawh an lo tih dan a ni.

Engpawhnise, kan hnam thil, rohlute hi kan humhalh in kan chawilar tur a ni a, amaherawhchu; a dahlau zawnga kan kalpui a nih erawhin a hlu lo thin a ni.