Mit enkawlna kawnga thawhho dan tur sawiho

Nimin khan Governor Dr. Hari Babu Kambhampati huaihawtin LV Prasad Eye Institute, Hyderabad hotute chuan Mizoram sawrkar-a Health Department, Zoram Medical College (ZMC), National Health Mission (NHM), Synod Hospital leh Eye Care Hospital thuneitu chu thawhho dan tur an sawipui.

Raj Bhavan-a he sawihona hunah hian Governor chuan India hmun hrang hranga LV Prasad Eye Institute-te hmalakna chu fakawm a tih thu sawiin, Mizoram mipui tana Mit lam inenkawlna tha zawk pek inhuama Health Departmen, Sawrkar leh Private Hospital te nena thawhona tha neih beiseia Aizawl an lo thleng chu thil lawmawm tak a nih thu a sawi a. Tunlai Khawvel hmasawnna sang chho zelin a ken tel emaw tih turin Mit lama harsatna tawk an tam zel tih sawiin, a enkawlna lamah tan lak a ngaih thu leh Mizoram-ah pawh Mit lama harsatna tawk tam tak an awm thu a sawi a, enkawlna tha kan mamawh nia a hriat thu a sawi bawk.

LV Prasad Eye Institute-te nen thawhona tha a awm chuan Mizoram mipui zingah Mit lama harsatna nei ten awlsam zawk leh senso tlem zawkin inenkawlna an neih theih a rin thu Governor chuan a sawi a. Mit lama harsatna tawk ten a hun takah enkawlna tha an lak loh avangin mitdelna a thlen fo nia a hriat thu sawiin, LV Prasad Eye Institute chu Mizoram-ah mipuite pan theiha an thiam a leh hmanrua te nen rawn in chhawp thei se tha a tih thu a sawi bawk.

He hunah hian LV Prasad Eye Institute Founder Dr. GN. Rao chuan an hnathawh dan tlangpui a sawifiah a. Mizoram nen a thawhona awm theih dan tur kawng hrang hrang te sawifiah chhunzawmin, Mizoram Sawrkar leh Hospital te pawh thawhhona tha tak an neih theih nan in hawng turin a sawm nghal bawk a. Health Department Principal Secretary Esther Lalruatkimi pawhin Mizoram dinhmun a tarlang bawk.

Hemi hnu hian ZMC Director Dr. John Zohmingthanga bakah NHM atangin Dr. Eric Zomawia Synod Hospital atangin Dr. R. Lalrindiki leh Eye Caare Hospital atangin Dr. KL. Remsanga te pawhin an hmalakna hrang hrangte an sawi bawk a. Sawihona atangin Ophthalmologist, Optometrist leh Nurse training pek kawngah te, khawl tha zawk neih kawngah leh sikul naupang te hnena uar zawk an Mit that dan ensak te chu thawhona awm theihna nia an hriat thu an sawi a. Vawiin hian ZMC an tlawh leh nghal dawn bawk a ni.

LV Prasad Eye Institute, Hyderabad-te hi Non-Profit Organizations (NGO) niin kum 1987 khan din a ni a, tunah hian India ramah Centre 275 an nei mek a, khawvela Eye Care Network lian ber a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar