MZP leh Zirtirtu Pawl ten inrawnkhawmna an nei

Mizo zirlaiten Mizo history, Mizo nunphung leh Zo nunze mawi te zirlaibu-ah tam zawk an zir theih nan MZP chuan nimin khan Zirtirtu pawl hrang hrangte nen inrawnkhawmna an buatsaih.

He inrawnkhawmna MZP Conference Hall, Aizawl-a neih hi MZP President Lalnunmawia Pautu chuan kaihruaiin Mizo zirlaiten Mizo history, Mizo nunphung leh zo nunze mawi te zirlaibu ah tam zawk an zir theih nan hmalak ho dan tur hrang hrang an sawiho a. Hemi hnu hian Resolution 4 siamin, Nu leh pa leh aia upate chunga nun dan mawi lantir chu Mizote tih dan phung a ni a, a Pathian thu bawk a, tunlai khawvelah hian thangthar ten kan chhawmnun zel theih nan tan lak tlan zel nise tha an tih thu an sawi a ni.

Hei bakah hian khawvel hnam tinte hian an hnam history leh nungphung an ngai pawi-mawhin an zahpui lo tih tarlangin, hei hi khawvel hnam tinte tihdan phung a ni tih an sawi a. Mizote pawhin kan nunphung leh tih dan tha khawvel kan hriattir zel theih nan zirlaite leh thalaite ah tan lak zel nise tha an tih thu te, Technology hmasawnna Social Media hrang hrangin min nuai mek karah hian Zonun ze mawi, aia upa zahna, tawngkam hawihhawm in hmun a chan zel theih nan zirlaite leh thalaite ah tan lakho zel nise tha an tih thu an sawi bawk.

He huna kalkhawmte hian Elementary atanga Higher Secondary syllabus hman mek ah Mizo history, Mizo nunphung leh zonun ze mawi a tam zawk telh anih theih nan hmalak ho zel ni rawh se tiin an Resolution-ah hian an tarlang bawk a ni. Nimin-a inrawnkhawmna hunah hian Zirtirtu Pawl hrang hrangte bakah MZP General Hqrs. a hruaitute telin sawihona hun huamzau tak an nei bawk a ni.