MZP in Governor hnenah an hmalakna an thlen

Mizo Zirlai Pawl (MZP) General Headquarters hruaitute chuan nimin khan Governor Dr. Hari Babu Kambhampati chu a Pisa-ah hmuin MZP hmalaknate an sawipui bakah thil pawimawh dang te sawipuiin heng ah te hian hma lak pui turin Governor chu an ngen nghal bawk.

Governor hnenah hian MZP hruaitute chuan Mizoram Legislative Assembly-in kum 2019-a a lo pass tawh, 'The Mizoram Maintenace of Household Register Bill 2019' tihhlawhtlin a la nih loh chungchang sawipuiin Governor chuan President Office lam atanga zawhna Mizoram sawrkara concern official ten an chhan hunah President Office atang hian Raj Bhavan lamah a rawn kir leh turah a ngai tih a sawi a. Mizoram sawrkarah bawhzui tur a nih thu leh tangkaina a neih chuan tul anga a lo bawhzui ve tur thu a sawi bawk.

MZU Campus chungchangah zirna nen inkaihhnawih ni si lo Invitee leh Guest sawma function neih a awm thin nia an hriat thu pawh sawiin, hei hi an duh lo hle tih an sawi a. Zirna nena inkaihhnawih ni lo pawn lam thil (Politics leh Sakhuana kaihhnawih thil) tih hi an duh loh thu leh MZU Campus-ah tun anga boruak muanawm neih zel a nih theih nan pawnlam thununna awm thei lakah inven a tul thu thlenin, Governor chu he thil hi ngaihvena, enzui turin an ngen bawk a. Governor chuan hmalak ngai a awm a, a lo tih ve theihah chuan hma a lo lak ve tur thu a sawi bawk a ni.

MZP hruaitute chuan Governor hnenah hian Zirlaite tan ham-thatna hrang hrang an siam thu leh a thlawna Computer zirna hmun, MZP Computer Centre chu hawngin zirlai engemaw zatin a thlawnin Computer an zir mek thu bakah Computer zir chhuakte tana hamthatna awm thei turte an sawipui bawk a. Governor chuan, MZP Computer Centre chu tha a tih thu sawiin, hun remchang hmasa berah a la tlawh ve tur thu leh a zirchhuakte tan India ram company lian hrang hrangah hna zawnpui a inhuam thu a sawi bawk a ni. He inkawmna ah hian MZP hruaitute hi an President Lalnunmawia Pautu hovin an tel a ni.