Nikum-ah CWC-in case 862 leh JJB-in 208 chingfel; CWC-ah nu/pa fel lo leh JJB-ah rukruk a tam ber

Nikum (2022) April atanga kumin (2023) March inkar khan Child Welfare Committee (CWC) chuan Case 862 an chingfel a, hemi hun chhung vek hian Juvenile Justice Board (JJB) chuan Case 208 an chingfel bawk.

Thudawn danin kum kaltaa CWC Case dawn/ngaihtuah zingah hian nu leh paten chhan hrang hrang vanga an tih tur an hlen loh (incapacitated parents) chu case tam ber a ni a, CWC hian kum hmasa lama Case chinfel hman loh (pending) 60 neiin nikum chhung khan case dawn thar 870 an nei a. A vaiin case 930 neiin heng zinga case 862 chu an chingfel a, case 68 chu kumthar lama ngaihtuah chhunzawm turin an dah a ni. CWC Case dawn thar zingah hian engemaw chhan hrang hrang - ruihtheih thil, hrisel lohna, rualbanlohna leh thil dang avanga naupang enkawl chhunzawm thei lo ang chi chu tam berin case an dawn thar 862 zinga 222 chu hetiang case hi a ni a, case dawn thar atanga chhutin 26% a tling a ni.

Incapacitated parent bakah hian mipat hmeichhiatna rawngkaia inkhawihna te, naupang ngaihsak loh, naupang kut thlak thin te chu case langsar zual an ni a. CWC hian naupang 182 chu an chhungte kutah an hlan let a, 347 chu Home-ah dah niin 133 te chu Councelling pek niin 106 chu an case an tihtawpsak bawk.

Juvenile Justice Board (JJB) chuan nikum chhung khan Case 208 an chingfel bawk a, JJB hian nikum chhung khan kum hmasa lama case pending 41 neiin case dawn thar 228 an nei bawk a, case 208 chingfelin a dang case 61 chu kumthar lama ngaihtuah chhunzawm turin an dah a ni. JJB Case dawn thar zingah hian rukruk chu tam ber niin 139 a awm a, case dawn thar zawng zawng atanga chhutin 70% a tling hial a. Rukruk bakah hian POCSO Act leh ND&PS Act te chu Case langsar zual an ni. JJB hian naupang 74-te chu Home a dah turin an ti a, mi 70 chu chhuahin CWC hnena thawn naupang 14 an awm bawk a, Special Home-ah naupang 38 thawnin pahnih chu thiltih sual an nei lo tih hmuh a ni bawk.

Nikum chhung khan Child Care Institution hrang hrangah naupang 675 dah (admit) niin heng te hi mipa 434 leh hmeichhia 241 te an ni a, Childrens Home-ah 400, Observation Home-ah 204, Special Home 37 leh Specialised Adoption Agency-ah 34 dah an ni bawk.