Jail tang tlanchhuak Jail hlamchhiah vanga ngai

Lunglei District Youth Congress Committee (LDYCC) chuan Lunglei District Jail-a tang mek mi 5 te awlsam taka an tlanchhuah theih chhan chu Mizoram sawrkar-in District Jail Lunglei a hlamchhiah vang leh a tih tur a tih loh avang ni-a an ngaih thu an sawi.

LDYCC hruaitute hian nimin khan Lunglei District Jail tlawhin hemi hnua thuchhuah an siamah he thu hi aan tarlang a. Tun dinhmunah District Jail Lunglei-ah hian thawktu mi 23 awm turah mi 13 chiah awmin Medical Duty tur pakhat mah an awm lo nia sawiin, Nurse pakhat an neih chu tun ah hian Serchhip ah attach a nih thu leh Pharmacist pawh kumin January khan pension tawhin a aiawh tur Vawiin thlengin dah ala ni lo bawk tih an sawi a. District Jail Lunglei hian Ambulance pakhat neiin motor dang pakhat mah a neih loh thu leh Driver pakhat mah pek an nih loh vangin Emergency a motor khalh tur pawn Warden atanga pawhchawp thin anih thu an sawi a ni.

LDYCC chuan District Jail Lunglei a an Building hrim hrim chu siamthat leh thawmthat mamawh em em vek an ni tih pawh sawiin, Staff quarters te pawh a tlabal em em tih an hmuh thu leh a thawktu ten tha leh zung sengin an thawmtha thin niin an sawi a. Duty post pasarih (7) awm zingah Mizoram Home Guard Duty te hian post thum (3) chiah an luah lum thei nia sawiin, heng Duty indaihlohna te pawh hi remchangah la in, Duty awm lohna post zawnah hian tlanchhuah nan an hmang thin niin an sawi a. Mizoram Home Guard Duty indaihlohna hi a rang thei ang bera dah belh vat turin Mizoram sawrkar chu an phut bawk.