Serchhip-ah bekang hriak herna khawl hawngin Oil Palm chingtute hmanrua sem an ni
.jpeg)
Mini Oil Expeller hawnna leh Oil Palm chingtute hnena bungraw semna puala inkhawm Serchhip Agriculture Conference Hall-a neih ah Agriculture Minister C. Lalrinsanga chuan Tel (Oil) hi kan ei nasat avangin Tel thianghlim ngei ei a pawimawh thu sawiin, “A thianghlim tawk lo kan ei tam chuan hrisel lohna tam takin min tlak buakzui thei a ni,” a ti a. Tel hi kan tharchhuah theih thlai anih avangin loneituten nasa zawka Tel lam chi kan thar a tul thu leh sawrkar pawhin hmalakna lian tak tak a kalpui reng thu a sawi a. “Kan tharchhuahte awlsam taka kan her zung zung theih nan Vawiin-a kan hawn a herchhuahna khawl hi a tangkai hle dawn a ni,” tiin Serchhip District-a loneituten tangkai taka an lo hman an duh thu a sawi a, hetiang khawl lian zawk hi Falkawn-ah bun tura hmalak mek a nih thu a sawi bawk. Loneitute tana sawrkarin hmalakna a kalpui hrang hrang te tarlangin Agriculture Minister chuan, “Kan ram hi kan ta a ni a, tuman min thawhsak dawn lo. Keimahni ngei hian taima taka thawkin hma lam i pan zel ang u,” tiin a sawm bawk.
He hunah hian khual zahawm Agriculture Director James Lalsiamliana pawhin Oil Palm chin chu Mizoram Assembly in kum 2004-ah a pass thu leh Company te nen inremna neiin kum 2005 atangin kan ching zui ta tih a sawi a. Godrej Agrovet ten Bukvannei-ah a herna khawl bunin kum 2008 atangin loneituten an hralh tan a, tunhnaiah kan tharchhuah a pung hle nghe nghe tih a sawi a. Sawrkar laipui in a man hi Oil dangte man a bithliah thin mila a bithliah ve tak avangin thlatin a rate hi a danglam ve hret hret a, tunah hian kg. khat Rs. 10.54 vel a ni, a ti bawk.
Serchhip District Agriculture Officer Tlangtimawia Zote kaihhruai he hunah hian Agriculture Department-a Deputy Director leh Serchhip Block-a BAO K. Laltlanmawia chuan Technical Report a pe a. Mini Oil Expeller bunna tur hian RKVY-RAFTAAR (2021-2022) hnuaiah cheng nuai 20 ruahman niin hemi hmang hian October 2022-a hma an lak tan thu a sawi a, kumin January thla khan a building hi sa zo in an sum hman bang atangin Chhawchhi leh hriak nei thlai dang herna tur khawl te deuh bakah HP 7.5-a chak Electric khawl an lei thu a sawi a. Helai hmuna Bekang herna tur khawl hi RKVY (2018-2019) sum atangin cheng nuai 2.8 in an lei thu a sawi bawk.
.jpeg)
Hei bakah hian Serchhip District-a Oil Palm chingtute hnenah Oil Palm rah lawhna tur Leilawn leh Hreite chu NFSM-OP atanga sem a nih thu a sawi a. Serchhip District-ah kum 2018 atangin Oil Palm chin a nih thu leh kum 2016 thlengin 3F ten hma lain an inhnuhdawh zui tak thu a sawi a. Kum 2021-ah Oil Palm chungchangah hmalak thar leh niin survey an neih hnuah Distict chhunga khaw 12-ah mi 334 ten Oil Palm hi la chingin kung 47,762 a awm thu leh Hectares 386-a zau ah chin mek a nih thu a sawi a. Serchhip District atang hian kum 2014-2015 khan Oil Palm rah hralhchhuah tan a nih thu te, quintal 4772 hralhchhuah a nih tawh thu leh khaw 7-a chhungkaw 53 chauhin Oil Palm rah hi an la hralh thu a sawi a bawk. Hemi rual hian District chhunga thlai (vegetables) chingtu intelkhawm Farmer Interest Group panga- Leng, Hualtu, Zawlpui-Chamdur, E. Lungdar leh Thenzawl te hnenah Multi Purpose Crates (Plastic basket) 20 theuh hlan a ni bawk.
Comments
Post a Comment