Aizawl-ah Ruihhlo do khuh hawnna hun hmangin ruihhlo dona atan cheng vbc.3 semchhuah a ni

Nimin khan ‘Ruihhlo do khuh hawnna’ chu Excise & Narcotics Minister Er. Lalrinawma hovin Aizawla Assembly Annexe Conference Hall-ah neih a ni a. He hunah hian ruihhlo dona kawnga hmalakna atan thawktu hrang hrangte hnenah cheng vbc. 3 semchhuah a ni.

Nimin-a ‘Ruihhlo do khuh hawnna’ hunah hian Excise Minister Er. Lalrinawma chuan ruihlo leh a kaihhnawih harsatna hian Mizoram min run nasa hle tih sawiin, “Ruihhlo hmansual leh dan lova tawlhruk hian mimal leh khawtlang nun a tichhiain, hmasawnna kawng hrang hrang a tithuanawpa, pawikhawihna leh dan bawhchhiatna a thlen nasa hle,” a ti a. Chief Minister Zoramthanga hmalakna in nikum (2022) May thla khan 'Core Committee on Ruihlo do' hi neih a lo ni tawh tih pawh sawiin, Committee in a lo rel angin Social Welfare Minister ni a a Chairman-na hnuaiah Working Committee din nghal niin, ruihhlo dona kawngah chak zawk a hmalak a nih theih nan Supply Reduction, Demand Reduction leh Harm Reduction te mumal taka do leh thawhho a tul takzet a ni tih a sawi. Core Committee Chairman Chief Minister Zoramthanga, Finance Minister ni bawk remtihpuina in thawhho dan tur te ruahmanna siamin sum mamawh zat te duan a nih thu sawiin, Working Committee hi vawi 3 lai an thutkhawm tawh thu asawi bawk.

Excise & Narcotics Minister chuan Working Committee ruahmanna angin District tinah DC kaihhruaina in Task Force din a nih tawh thu sawiin, “Anni hian District leh Village Level-ah ruihhlo dona kawngah hma chak takin an la dawn a, chutih rualin he ruihhlo dona kawngah hian NGO, Khawtlang, chhungkua, mimal tin kan tanrual tak zet zet a ngai tawh a ni,” a ti a. Ruihhlo dona atan an mamawh ang sum pek an ni chu an lawm hle tih sawiin, “Ruihhlo dona kawnga thawktute a ngaih pawimawh zia a tilang chiang hle a ni,” a ti bawk.

Nimin-a ‘Ruihhlo do khuh hawnna’ hun hi Ruihhlo Do Core Committee Vice Chairman leh Central YMA President R. Lalngheta chuan kaihruaiin Core Committee Secretary Prof. Lalnuntluanga chuan an hmalak tawhna hrang hrang a tarlang a. Ruihhlo dona atan hman turin NGO, Department leh District hrang hrang Deputy Commissioner te hnenah cheng vbc. 3 sem a ni a. District hrang hrang DC leh SP, Mizoram Police, Excise & Narcotics Dept. Food & Drugs Administration, MSACS, YMA, YLA leh MTP aiawh an tel a ni.