Kawlphetha MW 20 pechhuak thei tur Vankal Solar Park P&E Minister in a hawng

Kawlphetha MW 20 pechhuak thei tur Vankal Solar Park chu nimin khan Power & Electricity Department changtu Minister R. Lalzirliana chuan a hawng a, Vankal Solar Park hi cheng nuai 2107 senga din a ni.

Sawrkar laipui-a Ministry of New & Renewable Energy (MNRE) leh Mizoram Sawrkar tangkawpin an din Vankal Solar Park hawnna hunah hian P&E Minister R. Lalzirliana chuan Vankal Solar Park tih puitlin a nih theih nana ram petu Vankal khawtlang mipuite chhuanawm a tih thu sawiin, Solar Park chu hawn fel ni tawh mah se a venhim leh enkawl zui zel kawngah neitu thinlung pu chhunzawm zel turin a fuih a. Hripui leng avanga hna a khaihlak hnuah Department leh hnathawktute'n theihtawp an chhuah leh, Sawrkar hmasa atanga ruahmanna awm tawh Sawrkar tharin chhunzawma Vankal Solar Park hawn a ni ta chu lawmawm a tih thu a sawi bawk.

Vankal Solar Park hi State Sawrkar sum cheng nuai 1707 leh Sawrkar laipui Ministry of New & Renewable Energy sum cheng nuai 400, avaiin cheng nuai 2107 senga din a ni a. Civil Work thawh nan hian cheng nuai 272.38 sen niin, Electrical Work thawh nan cheng nuai 1834.77 sen a ni. Kum 2018 August thlaah lungphum phuma bultan niin February ni 16, 2023 khan hlawhtling taka Trial Commissioning tih a ni a, March ni 18, 2023 khan Commercial Operation tih tan a ni thung. Solar Plate bun hna hi M/S Sunfree Northeast Renewable Energy Pvt. Ltd. leh M/S ATA Renewable P4 Pvt. Ltd. ten thawkin M/S Sunfree Northeast Renewable Energy Pvt. Ltd. hian Power MW 15 siamna tur buaipuiin, M/S ATA Renewable P4 Pvt. Ltd. in Power MW 5 siamna tur an buaipui thung a ni. Hawn a nih hnu kum 25 chhung enkawl hna Company te'n an thawk chhunzawm dawn a. Hemi atanga power siam chhuah hi Mizoram Sawrkarin Unit khat zel Rs. 3.94/-in a lei thei dawn a ni.

Vankal Solar Park-ah hian power lakluh leh pekchhuahna tur 132/33 kV Sub-Station leh Control Room-te bunfel niin, hmun dang atanga power lokal nen thlunzawm niin, Mizoram puma hman theih tura ruahman a ni a. Ram acre 144 a zauah Solar Plate/Module 52453 bun a ni a, heng bakah hian Inverter 113, Inverter Control Room (ICR) 7 leh Main Control Room (MCR) 1 a awm bawk a. Chhinchhiah danin Vankal Solar Park hian nimin khan a chak lai berin Power Mega Watt 19.06 thleng a pechhuak thei a ni.