Ministry of Social Justice & Empowerment buatsaih Review Meeting - Chintan Shivir neih a ni

Ministry of Social Justice & Empowerment, Government of India buatsaiha Zirtawpni kalta atanga ni thum chhung awh Review Meeting- Chintan Shivir neih chu zawhfel niin Mizoram atangin Social Welfare Minister Lalrinpuii chu a tel a ni.

The Lalit Hotel, Chandigarh-a Review Meeting - Chintan Shivir ah hian Social Welfare Minister Lalrinpuii chuan Ministry kalpui lai Scheme hrang hrangte hlawk zawka kalpui a nih theih nan Theme bik neiin member te then hrangin, sawihona hun a hranpaa an hmang thin chu a hlawkpui thu a sawi a. Mizoram lamah pawh hetiang anga Meeting huaihawt ve ngei a duh thu a sawi a. Heng sawihona hrang hranga point pawimawh tarlan te chu uluk taka lo ngaihtuah turin Ministry chu a ngen a. India ram chu hnam ze hrang hrang awmna, tawng leh sakhaw hrang hrang nei, sik leh sa thleng pawha inang lo tak tak te chenkhawmna a nih avangin an danglamna te hre reng chunga Scheme leh Project kalpui dan tur duang thin turin a ngen bawk. Social Welfare Minister chuan Mizoram chu ram inlungrual leh tangrual an nih thu sawiin, thil tha ah chuan mipui, Sawrkar leh tlawmngai pawl te tha taka an thawhho thin thu leh chu chuan ram mipuite tana hmalakna ah hlawhtlinna a thlen thin thu a sawi bawk.

He Review Meeting - Chintan Shivir-ah hian Ministry of Social Justice & Empowerment hnuaia hmalakna hrang hrang thlirho a nih bakah hmachhawp hrang hrangte chak zawk leh tha zawka kalpui dan tur sawiho a ni a. Social Justice Delivery kawnga mipuite nena tanhona tha zawk neih theih dan turte mai bakah Public Private Partnership Mode a kal chhoh dan tur kawng te ngaihtuahho a ni. MOSJE hnuaia hmalakna kalpui dan hrang hrang awlsam zawk dapin, a dawngtu tur tak te hnena Sawrkar hmalakna tha taka a thlen ngei theihna tura hmalak dan turte bakah, MOSJE hnuaia hmalakna hrang hrang chungchanga Awareness tha zawk neih theih dan turte ngaihtuah ho a ni bawk. Hei bakah hian Ministry hnuaia hmalakna hrang hrang SAMAVESH portal te, NMBA 2.0 apps te, SETU apps te, SMILE apps te bakah beggar homes atana guidelines te tlangzarh a ni nghal bawk.

Tun tuma Review Meeting-ah hian sawrkar laipui atangin Union Minister Dr. Virendra Kumar, Union Minister of State BL Verma te an tel bakah State hrang hranga Social Welfare leh a kaihhnawih Department changtu Minister te leh Department Officials te an tel a. Mizoram atang pawhin Social Welfare Minister Lalrinpuii telin Lalzarmawii IAS, Commissioner & Secretary; Gracy Lalchhanzuali, Deputy Director, Social Welfare Department leh H. Lalhruaitluanga, PS to Minister ten Minister hi an tawiawm a ni.