ZPM in AMC Inthlan-a Hnehna Lawmna neiin Aizawl Mayor atan H. Lalremtluanga ruat a ni

Aizawl Municipal Corporation (AMC) Inthlanna neih zawh a nih hnuah Ward No. IV atanga thlantlin H. Lalremtluanga chu Mayor a ni dawn.
AMC Inthlanna a Party mal-a sawrkar siam thei ZPM Party chuan nimin khan Vaivakawn Auditorium-ah AMC General Election-a Hnehna Lawmna hun hmangin AMC Executive Body tur an puang a, AMC Ward No. IV atanga thlantlin H. Lalremtluanga chu Mayor niin Ward No. XVI atanga thlan R. Lalawmpuii chu Deputy Mayor a ni anga, Executive Corporators mi pali (4) ruat theih ah Christina Roluahpuii Sailo (Ward No. VIII), Vanlalhruaia (Ward No. XIII), Vanlalfaka (Ward No. III) leh K. Lalrodinga (WardNo. XVIII) te an ni ang.

AMC Inthlan-a hnehna lawmna ah hian ZPM Adviser K. Sapdanga chuan ZPM chu thawhrimna hmachhuantu an nih thu sawiin, “Pathian malsawm tlakin kan thawkrim ve ni te hian ka hria a, thawhrimna kaltlanga Pathian leh mipuite malsawmna kan chan hi kan chapopui a thiang ve lo,” a ti a. “Vawiin hi ZPM tan ni lawmawm a ni a, Aizawl khawpui tan ni chhinchhiah tlak a ni bawk. ZPM kaihhruai AMC lo piang thei ta hi a lawmawm a, min vote-tute min vote tlin chhan erawh kan hre reng tur a ni. ZPM Party naupang tak hian a din tirh atang khan kalphung thar a zuar a. Thil tha tih kan duhna te, siamthat duhna nena hma kan lakna te mipuiin min hriat sak a. Chu chuan zawi zawiin rah tha a chhuah mek a ni,” a ti a. “Kan Chief Minister hova reform kan siamte pawh hmuh theihin kan lo ti hlawhting tan chho mek zel ta a. Aizawl mipuite hian chu chu an hmuh hmaih lo a, seat 19 awma seat 17 hauh theia min lo thlang tling hi hna thawk chhunzawm tura min beisei vang a ni,” a ti a. “ZPM chuan lalna leh thuneihna hi kan enjoy tur a ni lo a, hna thawh nan kan hmang tur a ni. Aizawl mipui hian sawrkar thlakna ngawr ngawr atan min thlang tling a ni lo ang, hna thawk thei turin min beisei a ni,” tiin corporator tharte a fuih bawk.

He hun kaihruaitu ZPM President mawhphurhna la mektu Chief Minister Lalduhoma pawhin mipuite hnehna chu beiseina vang a nih thu leh chu chu a tha zawk beiseina a ni tih sawiin, “Mipui ten duh loh an nei a, duh an nei a, an duhthlanna chu vote hmangin an tilang ta a. Min enna tur leh min tehna tur pawh kan hnathawh danah a ni dawn, chuvangin, kan auhla leh kan manifesto anga hna thawh hi kan mission pawimawh ber a ni,” a ti bawk.