Ruahsur tleh thli tleh ah In chhia awm nual; Chhiatna tuartute sawrkar in a thlahthlam dawn lo

Zonuna Kawlni /

Tunhnaia ruahsur leh thlipui thawk chuan Mizoram hmun hrang hrangah chhiatna a thlen a. Chief Minister Lalduhoma chuan chhiatna tuarte hi sawrkar chuan a thlahthlam dawn lo tih sawiin, Dan anga tanpuina awm theih apiang tih sak an nih tur thu a sawi bawk.
 Pathianni zan atanga nimin thlenga Mizoram hmun thenkhat a To thli leh ruah sur hian hmun hrang hrangah chhiatna thlenin In chhia a awm nual a, mihring thi leh hliam erawh an awm lo nia thudawn a ni. Serchhip District-ah chuan Thenzawl-ah In pariat leh Bungtlang Chhim Veng-ah In pakhat chu luah zui tlak lohin a chhia a, heng khua bakah hian Serchhip-ah te pawh In chhia awmin Serchhip DC Office-ah report a lut mek a, Vawiin lam hian chhiatna thlen dan kimchang hi hriat theih a nih beisei a ni.

Aizawl District-ah chuan Sialsuk leh Lungsei khua ah In chhe vek pakhat ve ve awmin heng khua te bakah hian Chamring leh Samlukhai khua ah te In chhia a awm nual a, Lunglei District-ah luahzui tlak loha In chhia awm lo mah se khaw 15-ah In chhia report a awm a, Kolasib District-a khaw pathum-ah In chhia awmin Bukpui-ah thing tlu in In pakhat a tichhe bawk a, Siaha District-a khaw pahnih ah In chhia report a awm bawk a. Hnahthial District-a Chhipphir, Bualpui ‘H’, Rawpui leh New Kawnpui-ah te In chhia awmin Chhipphir-ah luahzui tlak lohna In chhia pakhat awmin In 41 chu a chung a chhe bawk a. Lawngtlai District-a Tuikhului-ah pawh nimin tlai khan In 20 vel a chhia nia report a ni bawk.

Chief Minister Lalduhoma chuan To haw in thli na tham tak a rawn ken tel avangin hmun thenkhatah chhiatna a thlen hlawm tih a hriat thu sawiin, chhiatna tuarte hi sawrkar chuan a thlahthlam dawn loh thu leh Dan anga tanpuina awm thei apiang a tihsak zel dawn tih a sawi a. DDMA zawng zawngte chu tanpui ngaite rang taka lo tuamhlawm zel tura chahin, Chhiatna tuarte tanpuia tha leh zung sengtu YMA leh khawtlang mipuite chungah lawmthu a sawi bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »