AMC Inthlan-ah Party hrang hrang te lawmthu sawi

Mizoram-a Political Party hrang hrangte chuan Aizawl Municipal Corporation (AMC) Inthlanna tluang taka neih a ni chu lawmawm an tih thu an sawi.

Niminpiah-a AMC Inthlan-a Vote thlak zawhfel a nih hnuah nimin khan Political Party hrang hrangte chuan thuchhuah siamin ZPM Party chuan boruak muanawm tak hnuaiah AMC inthlan tluang taka zawhfel a nih thu sawiin, Inthlan buatsaihtu State Election Commission te, vote thlakna lama mawhphurtu Polling Party te, Dan leh thupek kengkawhtu Police te leh vote thlaktu Aizawl khawpui mipuite zawng zawng te chungah leh an party in hnehna an chan theihna tura thawktu hrang hrangte chungah lawmthu an sawi a. “ZPM chuan Pathian leh mipuite zarah he AMC Inthlan 2026-ah hian hnehna sang tak chan ngei kan inbeisei a. Kan ram leh hnam tan, kan khawpui Aizawl leh mipuite hmasawn nan Election Manifesto ang taka Municipal Sawrkar tha din turin theih-tawp kan chhuah zel dawn a ni,” an ti bawk.

MNF Party chuan hah taka Inthlanna buaipuitu thawktute chungah lawmthu an sawi thu thuchhuah siama tarlangin, “Inthlana Vote tla tlem erawh a pawi kan tiin, democracy rama mipuiin kan duhna kan lantirna kawnga thawkchhuak kan tlem hi Inthlanna buaipuitu Sawrkar hlawhchhamna kawng khatah kan ngai,” an ti a. “Vote nei tura inngai, AMC E-Roll 2026-a awmlo, Vote thlak tura kal hawihai ta engemawzat awmte hi a pawi kan ti a. 61.14% chauh Vote thlak kan ni hian abak vote thlaklo 38.86% te duhthlanna ai a awh dawn tihna a ni a, a huapkim tawklo hle in kan hria a. Vote thlaktute zinga 50% chung lamte thlanchhuah chauhin kan Aizawl khawpui enkawl hna hi an thawk dawn tihna a ni a, duhthusamin a kal a kimlo hle ah MNF chuan kan ngai a ni,” an ti bawk.

Mizoram Pradesh Youth Congress Committee (MPCC) pawhin nimin khan thuchhuah siamin Aizawl Municipal Corporation General Election 2026-ah Vote thlak zawhfel a nih tak thu tarlangin, “He hun tluang taka min hman tirtu Pathian hnenah lawmthu kan sawi a. Inthlan buatsaihtu State Election Commission leh thawktu zawng zawngte, Mizoram People's Forum (MPF) chungah leh thahnemngai taka vote thlaktute zawng zawng chungah te MPCC chuan lawmthu kan sawi takzet a ni,” an ti a. A bik takin, Congress party Candidate te leh anmahni khawngaiha vote petute, an tlin theih nana hah taka thawktu zawng zawngte chungah lawmthu an sawi tak meuh meuh tih an tarlang bawk. Congress Thalaite pawhin nimin khan thuchhuah siamin Ward thenkhatah MPF ina khak ngai hial khawpa dan palzutna a thleng pawi an tih thu sawiin, thleng zui tawh lo se an duh thu pawh an tarlang bawk a. Aizawl Veng tinah nasa takin Congress Party kaihhthawh a nih thu aan sawi bawk.