AMC Inthlan-ah party hrang hrang ten beiseina sang tak an neih thu an sawi

Aizawl Municipal Corporation (AMC) Inthlanpui atan nimin khan tluang taka Vote thlak niin Party hrang hrang ten beiseina sang tak an neih thu an sawi.

ZPM hruaitu leh Chief Minister Lalduhoma chuan nimin chawhma lam khan AMC Inthlan ah hian Vote thlakin hemi hnua thuthar thehdarhtuten an kawmna ah ZPM chu AMC inthlanah sawrkarna an chan ngei a beisei thu a sawi a, tunhnaia ZPM Party beihna hrang hrang an tawh chu an party thatna vek tur anih thu sawiin, ZPM an sawrkar chuan Aizawl khawpuiin hma a sawn phah a beisei thu leh AMC tha zawk chu an intiamna a nih thu a sawi a. State sawrkar leh Municipal chu thawhho ngai anih avangin inlungrual taka an awm a ngai tih pawh sawiin, kawng tam taka hmasawnna turah thawhdun a ngaih avangin ZPM sawrkar ngei a ngaih thu a sawi a, Opposition lamin sawrkar an thlawp that tawk loh thin avangin Ruling lai thlantlin mai chu hmasawnna tha zawk leh awlsam zawk anih thu a sawi bawk.

MNF President leh Chief Minister hlui Zoramthanga chuan nimin zing khan Vote thlakin AMC inthlana ah an Party chu an chak ngei an inbeisei thu a sawi a. Tun tum AMC inthlan-a an party aiawh turte chu an that tawk thu leh MNF Candidate that ber tum anih thu sawiin, an Candidate te an rintawk thu leh beiseina sang tak an neih thu a sawi a. AMC-a term hnih mumal taka sawrkar an siam chu a fakawm tih sawiin, sawisel pawh a hlawh lo khawp niin a sawi a. State sawrkar ZPM sawrkar chu mipui in an sawisel nasat tawh thu sawiin, Aizawl khawpui mi an changkanna, an finna, engkim an hmuh chianna hmunah chuan chakna an neih ngei an inrin thu a sawi bawk.

MPCC President Lal Thanzara chuan tun tuma AMC Inthlanpui-ah hian Candidate hrang hrang zingah Congress Candidate chu party anga thlir loh chuan Ward chhunga tha ber te an ni hlawm vek tih sawiin, khawtlanga mi chhuanawm tak tak an nih thu leh Candidate an neih that ber thu a sawi a. An khingpui lian ber chu ZPM an ni tih pawh sawiin, MNF nen chuan intiat tawk velah an inngai tih a sawi a, ZPM chu State-ah rorel lai party an nih avangin Candidate an tling tam thei tih pawh sawiin, Congress chu AMC-ah sawrkarna siam zo lovin awm mahse an party chuan san lam an pan zel tho tih a sawi a, dinchhuah hun an la nei ngei dawn tih a sawi bawk.

BJP President Dr. K. Beichhua chuan AMC Inthlan ah hian an party chuan beiseina sang tak nen tling ngei tura an beisei mi 11 te Candidate-ah an thehchhuak tih sawiin, Aizawl khawpui changkang leh felfai tak siam an tum thu a sawi a. State pum thlirin BJP Party chuan hma a sawn zel thu leh thalaiten an bawh chho zel thu te pawh sawiin, Tualto party ringawta innghah that loh zia mipuiin an hre chho mek niin a sawi a, BJP-ah hmasawnna lian zawk a awm thei tih chu mipuite pawm dan ani chho zel tih a sawi bawk.