Ram tih hmasawnna tura pawimawh ber chu khawtlang tih hmasawnna a nih thu a sawi

Zonuna Kawlni /

Rural Development & Administration Department changtu Minister Prof. Lalnilawma chuan ram tih hmasawnna tura pawimawh ber chu khawtlang tih hmasawnna a nih thu a sawi.

Nimin khan ‘Sashakt Panchayat, Sarvangeen Vikas’ (Empowered Panchayats, Holistic Development) tih thupui hmangin ‘National Panchayati Raj Day’ lawmna chu Aizawl-a DRDO Conference Hall-ah neih niin he hun a hmanpuina ah RD&AD Minister Prof. Lalnilawma chuan ram tih hmasawnna tura pawimawh ber chu khawtlang tih hmasawnna a nih thu tarlangin, chumi atana mawhphurhna pawimawh tak chu khawtlang inrelbawlna kaihruai tura thlanchhuah Village Council Member-te kutah a awm thu a sawi a. Kum 2047-a India ram hi ram hmasawn leh ropui,’Vikshit Bharat’ a siam a nih theih nan Village Council hi hmanraw tangkai tak an nih mek thu a sawi bawk.

Prof. Lalnilawma chuan Village Council Act thar tlangzarh a nih thu tarlangin, he Dan bu chhungah hian Village Council-ten thu an neihna chi hrang 21 lai tarlan a nih thu leh an mawhphurhna pawimawh tak tak pawh ziahlan a nih thu a sawi a. Village Council member-te lawmman ennawn a nih theih nan hmalakna a kal mek thu sawiin, 15th Finance Commission hnuaia 2021-22 Grant la bang te, kum 2022-23, 2023-24 leh 2024-25 Grant-te hmuh tawh a nih thu a tarlang a. 16th Finance Commission-ah chuan Own source of Revenue, Village Council, mahni inenkawl thei tura ruahmanna siam thiamte chu ngaih pawimawh an nih tur thu a sawi a. Mahni ke-a din tum, mahni-a intodelh tum tlat VC chuan khawtlangah hmasawnna a thlen chak zawk thu a sawi bawk. 

Nimin-a National Panchayati Raj Day lawmna ah hian LAD Director Dr. Lalngura Tlau chuan kalkhawmte lawmna thu sawiin, rampum huapa inelna hrang hrang zing ah Kawrthar North VC chuan Theme 5-na ‘Clean and Green Award’ an dawn avangin lawmawm a tih thu a sawi a. Hmalakna hlawhtling hi Village Level-ah nasa takin a innghah thu a sawi bawk.

He huna tarlan a nih danin Mizoram pumah Village Council 830 a awm a, chung zinga 286 chu Autonomous District Council Area chhunga mi an ni a, Village Council te thawmthat nan Village Council tin ah Computer set sem chhuah mek niin National Panchayati Raj Day pual hian Village Council 12 te hnenah Computer Set hi hlan nghal a ni bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »