Thuchhuah lem siamtu nia hriat Police ten man nghal

Zonuna Kawlni /

Mizoram Police te chuan sawrkar thuchhuah lem siamtu nia hriat chu darkar 24 chhunga man nghalin thubuai siam sak a ni.

Hemi chungchanga Mizoram Police hotute sawi danin April 27, 2026 khan Office Memorandum lem pakhat (Office Memorandum No. F-23012/36/2025-ESTT-CSD, ni 27 April 2026), General Administration Department-in ruahsur nasat avanga sawrkar chawlh a puanna ni awm tak chu Social Media platform hrang hrangah thehdarh niin mipuite tan buaina nasa tak a chawk chhuak a. He document-ah hian Irene Zohlimpuii Chongthu, Additional Secretary, GAD hming chuangin, Ch. Lalnunkima, Deputy Secretary, GAD-in digital signature-in a sign hnan angin a lang a.

Hemi chungchangah hian General Administration Department-a Under Secretary, Christina Lalmuanzuali chuan Cyber Crime Police Station-ah dan anga hma la tura ngenin FIR a thehlut a. A ngenna angin Cyber Crime Police Station-ah hian April 27, 2026 khan thubuai ziahluh nghal niin uluk taka chhui nghal a ni a. Document lem siamtu hi rang takin darkar 24 liam hmain chhui chhuah a ni a. He sawrkar thuchhuah lem siama vawrhdarhtu nia hriat Lalramhlua (18), Upper Republic, Aizawl nia insawi chu man nghal a ni.

Mizoram Police chuan Sawrkar document siam danglam emaw, siam chawp leh thehdarh chu dan kalh tlat a nih thu sawiin, hetiang thil lakah hian mipuite fimkhur hle turin an chah a. Lo inhnamhnawih te chungah dan anga na taka hmalak zel a ni dawn tih an sawi a. Hei bakah hian Mizoram Police chuan mipuite chu Social Media hrang hrang- Facebook, Instagram, Whatsapp leh a dangte hmanga an thil thawndarh ah fimkhur lehzual tur leh thudik finfiah hmasa thin tura an ngen thu an rarlang bawk a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »