Covid kai mi 8 enkawl mek; mipuite fimkhur turin chah
Health Department hnuaia Integrated Disease Surveillance Programme (IDSP) thuchhuah in a tarlan dannin Mizoram-a COVID-19 hri kai enkawllai mi 10 te enkawl dam an nih hnuah nimin thleng khan hri kai enkawllai mi 8 an la awm mek a, heti hian Mizoram-ah mi 19,98,442 te enfiah tawh atangin COVID-19 hri kai mi 2,39,710 hmuh ni tawhin mi 2,38,968 te enkawl dam an ni tawh a, hri kai zingah mi 734 te chuan he hri hi an thihpui tawh a ni.
IDSP thuchhuah chuan hun engemaw chen COVID-19 kai kan awm tawh loh laiin tunhnai ah kai thar an awm leh ta nual tih tarlangin, “Covid-19 hi a la reh lo a, a khat tâwka rawn lanchhuah veleh chang a nei thin a. He natna laka kan him theih nan theihtâwpa kan fimkhur tlan a tul hle. Kan hriat tawh thin angin he natna hi inkaidarh awlsam tak leh fimkhur ngai tak a ni,” tiin mipuite chu invenna turte zawm turin an chah a. Covid-19 chu Khawsik, Luna; Taksa na, sil themthum; Ruhna leh Chau; Thawhah; Hritlâng, Khuh leh Hrawk na te in a langchhuak tih tarlangin, he natna lakah hian Raipuar te, Nausen, Kum upa leh natna benvawn nei bakah hun rei tak chhûng damdawi hmanga inenkawl ngai te chu fimkhur zual a tul thu an sawi.
He hri laka invenna atan Puipunna hmuna awm tam loh te, Mit, Ka leh Hnar te khawih loh te, Midang nen kut leh kut invawn/inchibai loh leh Mahni rinthua damdawi ei loh tur a nih thu te tarlangin, Khuh leh hahchhiauin Hmui leh Ka te inhup thin tur a nih thu te; Sahbawn-in kut fai taka sil thin tur a nih thu te; Thil tuiril in tam tur a nih thu leh Hritlang khawsik kan neih chuan midang te hnaih lovin awm nise, loh theih loh anih pawhin Face Mask hman thin tur a nih thu te an tarlang bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!