Serchhip District-a SCC hrang hrang atangin Sawhthing kg 11,06,608 hralh a ni tawh

Mizoram sawrkar in Serchhip District-a Sawhthing leina tura a ruahman, Secondary Collection Centre (SCC) hrang hrangah tun thlengin Sawhthing hralh tur bag 42,216 dahluh ni tawhin tun thlengin hralh loh bag 7429 ala awm a, Sawhthing kg 11,06,608 chu hralh a ni tawh.

Nimin khan khan Sawhthing lakkhawm leh hralh chungchangah Serchhip-a District Agriculture Marketing Committee chu an Chairman leh Bawrhsap Paul L. Khuma hovin Serchhip District-a Secondary Collection Centre (SCC) hrang hrangte hnathawh dan leh hmasawnnate thlirletin Serchhip DC Meeting Hall-ah an thukhawm a, he hunah hian Serchhip District-a SCC Supervisor theuhte telin an Centre theuh a Sawhthing hralh tawh dan te an tarlang a. He huna tarlan a nih danin Serchhip District chhunga SCC hrang hrang 8-ah tun thlengin Sawhthing hralh tur bag 42,216 dahluh ni tawhin Sawhthing kg 11,06,608 chu hralh a ni tawh a, tunah hian Sawhthing la hralh loh bag 7429 a la awm bawk a ni.

Serchhip District-ah hian SCC pariat (8) - Serchhip, Chhingchhip, Khawlailung, Thenzawl, E. Lungdar, N. Vanlaiphai, Lungpho leh Mualcheng-ah te awmin February 2026-a Sawhthing lakkhawm hna thawh tan a nih atanga April ni 18, 2026 thlenga report chu hetiang hi a ni :

Thenzawl SCC-ah Sawhthing bag 10,901 dahluh niin kg 3,21,867 an hralh tawh a, Godown-ah bag 2,535 a la bang a. Serchhip SCC-ah bag 8,465 dahluh ni tawhin kg 1,65,446 chu hralh tawhin Godown-ah bag 2,476 a la bang a. Lungpho SCC-ah bag 7,202 dahluh a ni tawh a, kg 1,81,650 hralh tawhin Godown-ah bag 889 a la awm bawk. Chhingchhip SCC-ah Sawhthing bag 5,508 dahluh ni tawhin kg 2,59,448 chu hralh a ni tawh a, tunah hian Godown-ah bag 214 a la bang a. Mualcheng SCC-ah Sawhthing bag 4,937 dahluh a ni tawh a, kg 43,585 hralh tawhin Godown-ah bag 1,315 a la awm a. Khawlailung SCC-ah bag 3,613 dahluh a ni tawh a, kg 1,34,612 hralh tawhin Godown-ah awm a awm tawh lo thung.

E. Lungdar SCC-ah Sawhthing bag 1,590 dahluh ni tawhin harsatna eng engemaw avangin hralhchhuah a la ni lova, Ropuiliani Women Farmers' Producer Company (RWFPC) te nen a rang lama hralhchhuah ve thuai a nih theih nan hma lakzui nghal tura rel a ni a. North Vanlaiphai SCC chu khaw that loh avanga thutkhawm ah an tel theih loh avangin an dinhmun hriat theih a ni lova. Nimin-a thutkhawm ah hian Buffer Stock chungchangte, E. Lungdar-a harsatna an hmachhawn chungchangte leh a chinfel dan turte sawi ho a ni bawk a; Bawrhsap Paul L. Khuma chuan SCC Supervisors-te hmalakna fakawm a tih thu sawiin, theihtawp chhuahtlang zel turin a sawm bawk a ni.