Serchhip DIPRO leh MJA Member te inkawmin MJA (SD) in DIPRO thar lawmna an buatsaih

Zonuna Kawlni /

Serchhip District Information & Public Relations Officer (DIPRO) R. Vanneihtluanga chuan nimin khan a Pisa-a leng-ah MJA Serchhip District Member te sawmin an inkawm a, nimin tlai khan MJA Serchhip District hian Serchhip Press Club-ah DIPRO thar lawmna hun an buatsaih bawk.
 Serchhip DIPRO thar R. Vanneihtluanga hian nimin khan MJA Serchhip District Member te hi a Pisa-a leng-ah sawmin ram leh hnam tana thawhhona tha zawk neih dan tur an sawiho a. Serchhip DIPRO chuan Media-te chu democracy innghahna lungphum pawimawh em em, a tha zawng leh a chhe zawnga mipuite rilru sukthlek thlenga hruai theitu an nih thu sawiin, mipui hnenah hriatna dik leh rintlâk an thlen a pawimawh hle tih a sawi a. Khawvel ram ropuite'n Media hmanga an hnam hmel leh chanchin an vawrh lar thin dante tarlangin, “Serchhip District hmasawnna tur leh ram leh hnam tana thil tha tihna kawngah sawrkar leh media-te lungrual taka thawhho a pawimawh hle a ni,” a ti bawk.

He hunah hian MJA Member te pawhin Serchhip District-a MJA Member te leh I&PR Department in thawhhona tha tak an lo neih tawh thin thu sawiin, Serchhip District in Serchhip mi leh sa ngei DIPRO thar a nei chu lawmawm an tih thu leh a lakah beiseina sang tak an neih thu an sawi a. Thuthar thehdarhna kawnga thawhhona tura an ngaih pawimawh hrang hrangte an sawi bawk a ni.

Nimin vek khan MJA Serchhip District chuan Serchhip Press Club-a Serchhip DIPRO thar lawmna leh chawimawina hun an buatsaih bawk a, he hun hi MJA (SD) Treasurer Zonunsanga Kawlni chuan kaihruaiin MJA (SD) President, Kapliana Pachuau chuan Serchhip DIPRO thar chu MJA (SD) ten an lo lawm tih sawiin, thawhhona tha tak an neih chhunzawm zel a beisei thu a sawi a. Serchhip District atanga Mizoram Information Service (MIS)-a tling R. Vanneihtluanga chu MJA te an chhuangin an lawmpui tih lantirna atan Vice President, Lalremruata Ralte chuan thilpek hlanin Serchhip DIPRO leh MJA member ten an ngaih pawimawh hrang hrang leh DIPRO thar lawmna thu te an sawi bawk a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »