Mizoram Upa Pawl (MUP) General Assembly nei

Zonuna Kawlni /

Mizoram Upa Pawl (MUP) General Assembly vawi 51-na chu nimin khan Aizawl-a Vanapa Hall-ah neih a ni a, Social Welfare, Women & Child Development Secretary Lalzarmawii chuan khualllian niin a hmanpui a ni.

MUP General Assembly-ah hian Social Welfare, Women & Child Development Secretary Lalzarmawii chuan kum upate chuan chhungkua, Kohhran leh khawtlang tana an thatlai hun chhung zawng an hman thu sawiin, kan ram hmasawnna atana an thawh tawhna ah te lawmthu a sawi a. Sawrkarin Old Age Pension (Upa Pension) cheng 1000 laia a tipung thei chu lawmawm a tih thu sawiin, Ministry of Tribal Affairs hnuaia MUP General Headquarters enkawl tur, Zemabawk-a Multi Service Centre sak mek te pawh tihpuitlin vat theih a beisei thu a sawi a. Social Welfare Department hnuaia Ainawn Veng-a kum upate enkawlna hmun (Old Age Home) tihchangtlun zelna tura hmalak a nih tur thu a sawi bawk a. National Social Assistance Programme (NSAP) hnuaia Old Age Pension pawh Central leh State atanga kan hmuh tur te chu a theih chin chin tunhnai maia pekchhuah tura hmalak mek a nih thu a sawi bawk.

Khuallian chuan MUP ten tha taka sawrkar an lo thawhpui tawhna ah lawmthu sawiin, mipui te hmasawnna tura thawhhona tha tak an neih zel a beisei thu a sawi a. Khawtlang leh ram nuam zawk kan siam theih nan kum upate tana khawvel nuam zawk siam hi mitinte mawhphurhna a nih thu a sawi bawk.

MUP General Assembly-ah hian an member boralta mi 1945 te sunna hun hmangin tun dinhmunah MUP member mi 70,102 awm mekin Mizoram pawn Jampui Area, Tripura bakah Branch 13 lai a awm tawh bawk a ni. MUP hian nikum (2025) khan an Member kum 100 tling mi 10 te hnenah chawimawina (citation) leh lawmpuina thilpek (Rs. 1000) hlan tawhin, kum 2010 atanga 2025 thleng khan he chawimawina hi mi 236 hnenah an hlan tawh a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »