Aizawl sipai chhuahsan ram-a thing kih tur enfiah leh tum a ni

Aizawl-a Assam Rifles chhuahsan ram-a sawrkarin thing a kih mek chu Gauhati High Court-ah PIL a luh avangin Court chuan tunkar Thawhtanni khan thupek chhuahin tawp lailawk turin a hriattir a, thing kih tur leh kih loh tur te hi la enfiah tura tih a ni.

Mizoram sawrkar in Aizawl khawpui laili-a Sipai te chhuahsan ram-a kawng laih a tum ah hian thing engemaw zat chu kih a nih avangin kar kalta khan mi thenkhat chuan hnathawktute an lo dang tawh a, hemi chungchanga Gauhati High Court-ah Petition thehluh niin Assam Rifles ram hlui-ah hian thing upa tawh tak tak, kum 100 chuanga upa tawh te a awm thu leh Sawrkarin kawngpui metre 14 thlenga tihzauh a tum avangin thingkung 174 chu kih tura tih an ni tih an tarlang a. Centre for Environment and Social Justice (CESJ) aiawhah Petition thehluttu, Saizampuii Sailo chuan a petition thehluhah chanchinbu thenkhat ziah dan a behchhana a, helai hmunah hian thing 400 chuang a awm a. Aizawl khawpui tan an tangkai avangin sawrkar chuan an kih chhan a sawifiah tawk loh bakah Aizawl khawpui tan a tha dawn lo niin a ngai a. Court chuan sawi buaitu a awm avangin thing kih hna chu chawl turin thupek a chhuah ta a ni.

Hetihlai hian nimin khan Chief Engineer, PWD (Highway) Office-ah he hmalakna hi sawiho niin thing kih tur leh kih loh tur te enfel lehin chhinchhiah that tura tih a ni a. PWD-in thing, kih tura chhinchhiah tawhte chu ennawnin, kawng zauhna atana kih ngei ngai te a varin an chhinchhiah anga, chumi hnuah PWD, CESJ leh UD&PA ten a huhoin an endik anga. Helai hmuna hnathawh reng reng PWD kaihhruainaa thawh tur niin Thing phun sawn theih te pawh a chhe lo thei ang bera phun sawn tura rel a ni bawk.