NMBA - Hriselna Kutpui nei turin inbuatsaih mek a ni

Thla thar May 14 leh 15-a Serchhip DC Pisa Tual-a ‘NMBA-Hriselna Kutpui’ neih tur chung-changa inbuatsaihna thlirin nimin khan mawhphurhna nei Department leh khawtlang hruaitute chu Serchhip DC Meeting Hall-ah an thukhawm.
He thutkhawm kaihruaitu Bawrhsap Paul L. Khuma chuan Hriselna Kutpui thil tum tlangpui sawiin, Serchhip mipui, a bikin mi harsa zawk leh rethei zawkte, hmunpui panna tur nei lo leh Serchhip-a damdawi inentirna tur la awm ve rih lo natna hrang hrang neite’n Doctor thiamte a thlawna an rawn theihna tur te, damdawi a thlawn emaw, man tlawm zawk emawa an hmuh theihna tur a nih thu te, Emergency leh rikrum thil - tui tla, drug OD, electric man, Stroke, Heart attack leh thildang eng engemaw ah te, damlo sawngbawl dan hriat lohna avanga nunna chhan theih ngei turte’n ho te-a nunna an chan thinna thleng thinte tih tlem a nih theih nan Basic First Aid Training leh hriselna kaihhnawih awareness hrang hrangte neih a nih tur thu a sawi a. Serchhip-a Doctor awmsa te bakah Aizawl atangin natna hrang hranga thiam bik Doctor te chahchhuah an nih tur thu a sawi bawk.

Heng bakah hian Ruihhlo avanga Mizoram thalai tam takte buaina tihziaawm a nih theih nan leh ruihhlo that lohzia inzirtirna te, thalaite’n rilru dik an put theihna tura inzirtirna te neih a nih tur thu sawiin, mi tam tak nunna chhanhima an awm phah ngei theih nan Serchhip District mipuite chu he Kut-ah hian kal theuh turin a sawm a; chanvo neitute pawh rawngbawlna rilru pua theihtawp chhuahpui turin a sawm nghal bawk a ni.

Nimin-a thutkhawm hi Serchhip District  Superintendent of Police Gavit Gogna IPS pawh telin, NMBA-Hriselna Kutpui chu mipuite’n hlawk taka an lo hman ngei a duh thu a sawi a; SDC Lalchhanhimi hnen atangin hma an lak dan tlangpui ngaihthlak a nih hnuin hlawhtling taka NMBA - Hriselna Kutpui hi hman a nih theih dan tur hrang hrangte sawiho a ni bawk.