MSSC Golden Jubilee lawmna Aizawl-ah neih a ni

Mizoram State Sports Council (MSSC) kum 50-na Golden Jubilee lawmna chu niminpiah khan Aizawl Mualpui-a R. Dengthuama Hall-ah neih a ni.

Mizoram-a Sports Association hrang hrang 34 te telna ‘Mizoram State Sports Council’ (MSSC) Golden Jubilee lawmna ah hian Sports Minister leh MSSC President Lalnghinglova Hmar chu khuallian niin MSSC hruaitu hmasa thahnemngai tak takte thawhrim rah ropui tak an tel tih sawiin, “Mizo zingah infiammi tha tak tak kan nei tawh a, chutih rualin International chu sawi loh, National Level-ah pawh kan hlawhtlinna hi a la beitham hle a, tan kan lak nasat a ngai a, theihtawp chhuah kan tum a, tum mumal tak nen hmalam pana ke pen kan tum a ni,” a ti a. Kalphung tha zawk leh felfai zawk a awm theihna theihtawp an chhuah thu sawiin, thurawn pawh an lak theih reng thu a sawi a. Mizoram leilungfate zingah Olympian pahnih chauh kan la awm chu tlawmngaihthlak a tih thu sawiin, India ramin kum 2036-ah Olympic thlen a tum a, hemi hun a lo thlen hi chuan Mizo thalaite thahnem tak India ram aiawha an tel theihna turin hmathlir mumal tak nen hma an lak mek thu a sawi a, Olympic a hlawhtlinna kan hmuh theihna tur nia an hriat Sports discipline 8 thlan bik an neih thu leh theihtawp chhuaha hma an lak thu a sawi bawk.

Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni a. The Mizoram State Sports Council Act, 2002-ah chuan Sports & Youth Services Minister apiang chu Ex-Officio President atan a ruat a, Secretary leh Finance Secretary hi sawrkarin a ruat bakah Vice President leh Joint Secretary te chu MSSC member zing atangin thlanchhuah an ni bawk. Tun dinhmunah MSSC hnuaiah hian State Level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap Tournament pakhat theuh hlawhtling takin an buatsaih tawh nghe nghe a ni.

MSSC Golden Jubilee pual hian April ni 22, 2025 khan Golden Jubilee Torch (meichher) Relay neih a ni a, Bawngkawn atanga tanin Sports Association 34 aiawh ten Aizawl khawpui chhungah meichher inpe chhawngin, Sports Minister Lalnghinglova Hmar, MFA President ni bawk chuan Aizawl Tennis Court-ah a tlan luh pui a, inkhawm tawite neih zui a ni.

MSSC Golden Jubilee lawmna inkhawmah hian MSSC hruaitu hluite leh hruaitu ni mekte chawimawina hlan an ni a, National Level chin chunglama Mizoram tana hlawhtlinna changte chawimawina hlan niin MSSC Award sem nghal a ni bawk.