ZPM Party in Road Map atan Manifesto hman tum

Zoram People's Movement (ZPM) Party chuan AMC Inthlan-a an Election Manifesto hi Road Map atan an hmang dawn tih sawiin, AMC chu Party invulh nan ringawt hman an tum lo tih an sawi.

Nimin-a AMC Inthlan result puan hnua Aizawl Press Club-a thuthar thehdarhtute an kawmna ah ZPM Party chuan Election Manifesto chu Road Map atan an hman dawn thu leh Manifesto zawng zawng chu ngaihpawimawh vek tur a nih rualin hmalakna hmasa tur an puang a. AMC chu mi tin ban phaka hnuhniam an tum thu leh hemi atan hian Mobile App leh AMC Community Help Desk siam a nih dawn thu te; AMC in mipui atanga sum a khawn hrang hrang te langtlang taka hmangin, hmuh zat leh hman zat te mipui hriattir a nih dawn bakah mipui chhawr tangkai theih tur zawngin a hmanna ruahman a nih tur thu te an sawi a. AMC Area chhung ni si, PHE Connection la nei ve lo te tan a kaihhnawih Department nen tangrualin tui thianghlim pek thuai tum a nih tur thu te; Aizawl khawpui chhunga Vawkvulh khapna Dan chu ennawnin zirchianna tha zawk leh ruahmanna tha zawk siamin Vawk vulh-a eizawngte tan ruahmanna siam a nih tur thu te; Mizoram Municipalities (Amendment) Act, 2015, Section 75 (A) in a sawi angin Aizawl khawpui chhunga mi rethei zawk (Urban Poor) te chawikang turin hma an lak dawn thu leh hemi atana Budget dah pawh a nih ang taka hman a ni ang tih an sawi.

AMC in Ran talhna (Slaughter house) a la neih loh avangin Aizawl khawpui daifem hmun remchangah siam tum a nih tur thu te; Khawpui faina kawnga hma kan sawn zel theih nan a theih angin Solid Waste Management Center tichangtlung tura hmalak a nih dawn bakah bawlhhlawh khawn dan leh paih dan kalphung ennawn a nih tur thu te; Building Permit & Lei laih Permit (SD&SM) regulation ennawnin, a muan chhante uluk taka zirchiangin, chak zawk leh rang zawka kalpui tum a ni anih tur thu leh Architect/Engineer/Supervisor rawih man rate pawh mumal zawka siam turin hma lak a ni ang tih te an sawi a. AMC in Finance Commission Grant a dawn that theih nan Own Source of Revenue (OSR) neih that a tul avangin, AMC OSR siam thei tur asset lian (mipui chhawr theih tur ni si) siam kawngah hmalak a nih tur thu bakah Apartment Rules-ah In chhawng ti Floor tinin LSC ang chi an neih theih nan hmalak a nih tur thu sawiin, he Dan hi Assembly-a put luh a, remtih a nih hnu-ah AMC in a umzui tur thu te an sawi bawk.

ZPM hruaitute chuan AMC result hian State Sawrkar mek ZPM Ministry chu mipuiten an rin tawk zia a tarlang nia sawiin, “Kan khawpui ber Aizawl-a Municipal Sawrkar siam tur pawhin mipui ten an ring tawk hle tih a tarlang bawk,” tiin he inthlan-a hnehna sang tak an chantir avangin Pathian leh Aizawl khawpui mipui te chungah lawmthu an sawi bawk.