MBSE in pawl 12 zirlaite tana HSSLC Exam a buatsaih ah zirlai za zela 87.67 in an pass
.jfif)
MBSE in kumin-a HSSLC Exam a buatsaih ah hian Arts, Science leh Commerce Subject-ah Exam tura inziaklut zirlai 12,399 awmin heng zinga zirlai mipa 5605 leh hmeichhia 6638, an vaiin 12,243 te chuan Exam an hmachhawn a. An zinga 12166 te hi Regular Candidate niin a dang 77 te hi Private Candidate niin Exam beitute atang hian mipa 4915 leh hmeichhia 5819, an vaiin 10,734 in an pass a, zirlai Exam atanga chhutin za zela 87.67 pass ang an ni a, Regular Candidate pass 10,677 leh Private Candidate pass 57 an awm a. Subject bat (Compartmental chance) nei 48 awmin Exam zingah hian mi 1394 te erawh an Fail thung a ni.
Subject mal-ah Arts Subject-a Exam tam berin zirlai 8714 ten exam hmachhawnin an zinga 7575 an pass a, Exam zawng zawng atanga chhutin za zela 86.93 ten pass in Cmpartmental chance nei 93 an awm a, zirlai 1046 te an fail thung a. Science Subject-ah zirlai exam 2770 awmin 2472 an pass a, za zela 89.24 pass ang niin Compartmental Chance nei 13 awmin 285 an fail thung. Commerce Subject-ah zirlai exam 759 awmin an zinga 687 an pass a, zirlai exam za zela 90.51 pass in Compartmental chance nei 9 an awm a, mi 63 te erawh an fail thung a ni.
Kumin-a HSSLC Exam result tihchhuah tak atanga a lan danin Mizoram pumah Candidate zawng zawng pass vekna School hi Arts-ah School 64 a awm a, Science-ah School 14 awmin Commerce-ah School 16 an awm thung a. Hetih lai hian Candidate zawng zawng fail vekna School pawh Arts-ah pakhat awmin Science leh Commerce-ah erawh Candidate zawng zawng fail vekna School a awm lo thung a. District hrang hrang dinhmun khailkhinna ah Arts Subject-ah Serchhip District in titha berin zirlai exam 344 zinga 316 ten pass in za zela 91.86 pass ang an ni a. Science Subject-ah Kolasib District chuan titha berin Exam zawng zawng 74 zinga 70 in an pass a, za zela 94.59 pass ang an ni a, Commerce Subject-ah Hnahthial District in titha ber ve thungin zirlai exam 4 ten an pass vek a ni.
MBSE Chairman JH. Zoremthanga chuan Pathian hruaina avangin result an tichhuak thei chu lawmawm a tih thu a sawi a. Mawhphurhna hrang hrang neiten an tih tur theuh tha taka an tih avang leh an thawhhona a ttat avangin result pawh hma taka tihchhuah theih a nih thu a sawi a, Compartment-te tan admission a buai lohna turin Exam buatsaih thuai a nih tur thu leh nikum aia kumina pass percentage a tha zawk chu lawmawm a tih thu a sawi bawk.
Chief Minister Lalduhoma chuan MBSE in HSSLC Exam 2026 result a tichhuak leh kumin ah zirlai pass zat za zela 87.67% a ni chho ta dawrh chu hmasawnna lawmawm a nih thu a sawi a. Zirlai hlawhtling zawng zawng te a lawmpui thu leh zirna sang zawk an zir zelna turah duhsakna a hlan thu sawiin, “Naupangten hlawhtlinna an chan theih nana theihtawp chhuahtu an zirtirtu leh an nu leh pate chungah ka lawm thin a. Exam fel fai tak buatsaihtu MBSE chungah pawh lawmthu ka sawi mawlh mawlh e,” a ti.
Chief Minister chuan tun tuma pass zo ve ta rih lo naupangte a lainat thu pawh sawiin, vawi khat hlawhchham vanga lo beidawng lo turin a ngen a. “Vawi tam tak lo hlawhchham ve tawh thin ka nih avangin hlawhchhamna in min tihhnual theihzia hi ka hria a. Beidawng lova bei zeltute ngei hi hnehtu an ni leh mai thin tih pawh ka hre chiang hle. Phur takin lo bei nawn leh ngei ang che u,” a ti bawk.
Comments
Post a Comment
I ngaihdan i sawi hian mipui ngaihdan i tarlang a ni!