Sports Minister Conference-ah Sports Minister a tel

Zonuna Kawlni /

India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu Inrinni leh Pathianni khan Srinagar-a Sher-i-Kashmir International Conference Centre (SKICC)-ah neih niin Sports Minister Lalnghinglova Hmar pawh a tel.

Ministry of Youth Affairs and Sports (YAS) buatsaih Sports Minister Conference hi Union Youth Affairs & Sports Minister Dr. Mansukh Mandaviya leh Minister of State Raksha Nikhil Khadse-i te chuan telpuiin Session pasarih a awm a, Mizoram Sports Minister Lalnghinglova Hmar chuan ‘Khelo Bharat Niti: Strengthening Centre State Coordination’ tih Session chu kaihruaiin Indian Sports kalphung inthlak mek chu lawmawm a tih thu sawiin, “Olympic 2036 thlir chunga hmalakna chuan Sports discipline zawng zawng a huam thei dawn lo a, Olympic Medal beiseiawmna discipline te thlurbinga duat bik an ngai. Kan kal dan ngai renga kan kal chuan kan result pawh a ngai reng dawn a, hmasawn tur chuan thlak ngai a awm thin,” tiin India-in Sports a kalpui dan a thlak a tul thu a sawi a; Sports Authority of India (SAI) siamthat tul a tih thu a sawi bakah Delhi atanga thutlukna siam mai loin State hrang hranga Sports Official leh Association te zin chilh thin turin sawrkar laipuia Sports hotute a sawm bawk.

Sports Minister ‘Chintan Shivir’ 2026 ah hian State 15 atangin Sports Minister an tel a, India in Olympic Games 2036 thlen tumin hma a la mek a, Olympic lam hawiin India sports kalphung a inher mek a. Sports Minister ‘Chintan Shivir’ pawh hi Olympic Games 2036-a Medal tam zawk la thei tura inbuatsaihna lam hawia kalpui a ni a. Ni hnih chhung hian Sports kaihhnawih topic hrang hrangah India dinhmun leh hmasawn ngaihna lai te thlirho niin, Olympic 2036 tinzawnin sawihona tam zawk hi kalpui a ni a; zirna in leh sports kaihkawp leh thil hrang hrang sawiho a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »