Tuichangral Games 2026 chu zawhel a ni ta

Khawhai Playground-a neih ‘Tuichangral Games 2026’ chu nimin khan zawhfel niin a kharna hun hi South Tuipui Bialtu MLA, Jeje Lalpekhlua chuan khuallian niin a hmanpui a ni.

Tuichangral Games kharna hunah hian South Tuipui Bialtu MLA Jeje Lalpekhlua chuan Tuichangral Games a awm theihna tura hma latute thawhrimna chu zahawm a tih thu a sawi a. East Lungdar Football Ground-a Grass phah a ni tur leh Volleyball Court siam-a a chung zar a ni tur chuan Tuichangral khua sawrkarin a ngaihpawimawhzia a lantir tih a sawi a. Tunlai khawvelah Sports chu eizawnna atan a hman tlak tawh rualin mi zawng zawng tan eizawnna atan hman theih a ni lo tih sawiin, “Hlawhtlinna chang tur chuan talent neih that ringawt a tawk lova, a thawkrim leh a taima apiang an thleng sang thin,” a ti bawk.

South Tuipui Bialtu MLA chuan Sports chu ‘Damdawi Mum Lian’ a nih thu pawh sawiin, eizawnna atana hmang lo te tan pawhin hriselna atan mai bakah midangte nen inpawhna tha siamtu a nih thu sawiin, mitinte infiamna engemaw tal ti ve turin a chah a. Zirna lamah emaw, infiamna lamah emaw pawh beidawn chang a awm thin tih sawiin, chutiang hunah chuan beidawng mai lova thawkrim zual sauh zawk turin he huna tel thalaite chu a chah bawk.

Tuichangral Games and Sports huam-chhung ah hian khua 33 awmin kumin hian Football-ah Mipa Team 15 leh Hmeichhia-ah Team 4 an inel a, Mipa-ah Sialhawk chuan Tlangmawi chu 4-2 a hnehin an Champion a, Hmeichhia ah Sialhawk in N. Mualcheng si khat fai-a hnehin an Champion bawk. Volleyball-ah Mipa-ah Team 11 telin Khawhai in Tualte hnehin an Champion a, Hmeichhia ah Team 8 telin Tualte chuan Biate hnehin an Champion bawk. Heng bakah hian kumin hian Under-16 tan Weight lifting, Boxing leh Wrestling-ahte inelna buatsaih a ni bawk.