Mizo hnahthlak te inpumkhat tak tak turin Tawng in hriat tawn a pawimawh thu sawi

Mizoram Rajya Sabha MP K. Vanlalvena chuan Mizo hnahthlak tam takte ti hrangtu chu tawng inang lo a nih thu sawiin, Mizo hnahthlak te chu insuihkhawm a, inpumkhat tak tak tur chuan tawng inhriat tawn a pawimawh thu a sawi bawk.

Mizoram Rajya Sabha MP K. Vanlalvena hian niminpiah khan New Lamka-a EBC Centinary Hall-ah ‘Zofate Insuihkhawm Seminar’ chu hmanpuiin tawng chu kan siam a nih loh thu leh Pathian siam a nih thu sawiin, Pathian thu-ah chuan tawng hrang vangin Van chen-a Insak tum te tihhran an lo ni tawh tih a sawi a, Mizo hnahthlak te min ti hrangtu leh min tidarhtu chu tawng a nih thu leh hei hi keimahni tih ni loin Pathian tih a ni tih a sawi a. Chuvang chuan, mahni tawng hmangaih vak te, mahni tawng ang thiam ve lo kan enhrang thin te hi sual lianpui a ni hran lo niin a sawi.

Rajya Sabha MP chuan inpumkhat leh insuihkhawm kan duh tak meuh chuan tawng in hriat sak kan duh a ngai tih sawiin, kan tawng chu eng tawng pawh nise tawng kan hriat sak duh miah loh te nen chuan inpumkhat a harsat thu leh kan tawng min ngaihnep saktute hmangaih chu thil harsa a nih thu a sawi a. Zohnahthlak zingah pawh tawng hrang hrang a awm thu sawiin, hetiang tawng in nuaibo sak talh tum ang hi Pathian dodalna tih chu a ngaihdan a nih thu a sawi a. Hnam inpumkhatna chu Politics a vote zawnna avangin a chhiat phah chang awm mahse, inpumkhat nan chuan vote pawh chan ngam a ngai tih a sawi.

He hunah hian Adviser to Chief Minister (Political) Lalmuanpuia Punte pawhin 'Mizo Tawng' chu Duhlian Tawng emaw Lusei Tawng emaw ti a vuah anih chuan Mizo inpumkhatna a that lehzual a rin thu sawiin, Manipur-a Zohnah-thlak awmte chu Mizoram atanga kaihchhuah nghawt theih an nih loh thu leh anmahni an auchhuah ve a pawimawh tih a sawi bawk.