Union MoS for Home Affairs in Mizoram rawn tlawh

Union Minister of State for Home Affairs Bandi Sanjay Kumar chuan ni hnih cham turin nimin khan Mizoram a rawn thleng a, sawrkar mi pawimawh te kawm nghalin Vawiin hian Saiha District-a sawrkar thuneitute a kawm leh ang.

Mizoram-a rawn zin Union Minister of State for Home Affairs Bandi Sanjay Kumar hi Lengpui Airport-ah Home Department-a Addl. Secretary Dr. Andrew H. Vanlaldika leh Protocol Officer C. Lalremruati ten lo dawngsawngin hemi hnu hian MINECO Conference Hall-ah Mizoram sawrkar Deparrtment hrang hrang hotute nen an inkawm a. He hunah hian Union Minister of State Bandi chuan hmun hla tak atangin harsatna leh mamawhte ngaithla turin a lo kal vang vang tih sawiin, inthlahrung hauh lova Mizoram hmasawnna tur atana an vei leh ngaih pawimawhte sawi turin sawrkar Official te chu a chah a ni.

He inkawmhona hi Chief Secretary mawhphurhna chelh lailawktu R. Zarzosanga’n kaihruaiin Home Secretary David Lalthantluanga leh Agriculture & Farmers’ Welfare Secretary Ramdinliani ten power presentation pe in an Department hnuaia Centrally Sponsored Scheme kalpui mekte sawifiahin, an hlawhtlinna bakah harsatna an tawhte leh a sutkian dan turte an sawifiah nghal bawk a, hemi hnu hian sawrkar Department hrang hrang aiawh te chuan an Department hnuaia hmalakna, harsatna leh mamawhte an sawiho nghal a, Union Minister of State hian report kimchang taka siam a, a hnena thehlut turin thurawn a pe a, a tul ang anga bawhzui a nih tur thu a sawi a ni.

He inkawmhonaah hian BSF leh 23 Assam Rifles DIG te ve ve pawh telin, Mizoram depa India ramri (Myanmar leh Bangladesh) a venhimna kenkawh chungchangte, ramri hung chungchangte leh ramri depa thingtlang khuate Vibrant Villages Programme kaltlanga tihchangtlun dan turte an tarlang a. Mizoram sawrkar officials te pawhin thil pawimawh chi hrang hrang – khualzin hip tam lehzual tura hmalak dan turte, India ram pawn atanga khualzin lo lut te’n Restricted Area Permit/Protected Area Permit chungchanga harsatna an tawh sutkian sak a tul thute, Sector hrang hranga Mizoram dinhmun leh Vikshit Bharat (developed India) 2047 dungthula Mizoram tihhmasawnna tur ‘Transformed Mizoram Vision 2047’ atana ruahmanna leh tihhlawhtlin turte sawiho a ni bawk.

Sawrkar mi pawimawhte nen an inkawm zawh hnu hian Union Home Minister of State hian Mizoram Police Headquarters, Khatla tlawhin GS Arya Mess-ah Mizoram Home Minister K. Sapdanga’n lo mikhualin thingpui a inpui a. Ruahman lawk dan chuan Bandi hian Vawiin hian Video Conferencing (VC) hmangin Siaha District-a sawrkar hotu pawimawh te a kawm ang a, VC hmang vek hian khawtlang aiawhte leh NGO aiawhte a kawm bawk ang.