Inter-College Debate Competition buatsaih a ni

Mizo Zirlai Pawl (MZP) General Hqrs. buatsaih ‘D-3 Inter College Debate Competition chu’ chu Ningani leh Zirtawpni khan Vaivakawn Cultural Centre cum Auditorium-ah neih a ni.

Mizoram-a College hrang hrangte inelna ‘D-3 Inter College Debate Competition’ ah hian College paruk (6) telin thupui pahnih, ‘Mizo hnam himna atan ILP hi a tha tawk a ni’ tih leh ‘Mizoram-ah zu zawrh hi a hun tawh a ni’ tih te hmangin Debate hi neih a ni a, a pumpui-ah Govt. Hrangbana College, Aizawl (Lalmalsawma & Lalrinmawii) te chu pakhatna niin Rs. 30,000/-, Trophy leh Certificate an dawng a, Pachhunga University College, Aizawl (Vanlalkhawngaih-dawngzeli & H. Rosangpuia) chu pahnihna niin Rs. 20000/-, Trophy leh Certificate an dawng bawk a, Best Debator atan Lalrinmawii (HBC) thlan niin Rs. 10,000/-, Trophy leh Certificate a dawng bawk a ni.

Debate Competition kharna hun hi Environment, Forest & Climate Change changtu Minister Lalthansanga chuan khuallian nia hmanpuiin Debate chu inhnialna a nih ngawt loh thu sawiin, “Thil kal zel dan tur thiam taka thliar hranna leh ngaihtuahna sawizawina a ni a, inelna thupui sawi turte hi sawrkar leh mipuite'n a an ngaihven tak tak thupui a ni dawn a, zirlai thiam tak takte'n in ngaihtuahna leh thu in rawn phawrhchhuahte hi ram pumin a ngaihven leh sawi zui tur a ni,” a ti a. “Mizote hi hnam tlemte kan ni a, ILP hi kan hnam inhumhimna tur atana Sap hovin a min duan sak a ni a, kan kalpui zel dan turah ngaihtuahna thui tak kan sen a tul a hle a ni,” a ti a. “Zu zawrh hi kan khawtlang leh Kohhran nghawng a ni,” ti bawkin zirlaite chu an thiamna zau tak nen he debate thupui hi ngaihtuah zui turin a sawm bawk.

He hunah hian MZP President Dr. C. Lalremruata chuan MZP ten Debate an buatsaih chhan chu Zirlaite tan inpuanchhuahna (exposure) remchang, mi hma a thusawi an zir nan leh an zirna kawnga hma an sawn zel theih nan a ni tih a sawi a, tun tuma an Topic chungchang sawiin, “MZP in a hman atanga hma kan lo lak tawhna thin leh Mizo mipuite, Political Party te ah pawh a inhnialna tawp awm theilo, zu zawrh chungchang te a ni a, heng hmang hian zirlaite'n ngaihtuahna thar kan sen theih nan he Debate Competition hi buatsaih kan ni,” a ti a. “MZP in a hmanni lawk a Inner Line Permit(ILP) kan check tum a kan hmuhchhuah mahni leh mahni in sponsor theihna dan kum 2016 khan Mizoram Gazette in a chhuah leh kum 2017 Gazette-a chuang hnamdang (vai) leh vai in sponsor theihna dan hmuhchhuah a ni a, hemi chungchangah hian Home Minister leh Chief Minister te pawh he Gazette hi min sut sak turin ngenna thehluh a ni a. Tun thlengin ngaihtuah a la ni lo a, Mizoram sawrkar thuneitute he Dan hi min sut sak ngei turin kan ngen nawn a ni,” a ti bawk.