AMC Inthlan-a Vote tla chhiar zawh niin Ward 19-a Ward 17-ah ZPM in hnehna an chang

Aizawl Municipal Corporation (AMC) inthlanpui neih-a Vote tla te chu nimin khan Aizawl-a Bawrhsap Pisapui-ah chhiar a ni ta a, Ward 19-a inthlanna neih ah ZPM party chuan Ward 17-ah hnehna changin party mal-a sawrkar siam thei khawpin hnehna an chang a, MNF leh Congress in Seat khat ve ve an la bawk a ni.
April 21, 2026-a AMC Inthlanpui neih-a Vote tla te hi nimin zing dar 8:00 atang khan Aizawl-a Bawrhsap Pisapui-ah chhiar a ni a, Vote tla te hi Counting Hall pali-ah ruala chhiar niin chhunlai pelh hret-ah result kimchang hriat theih a ni a, State sawrkar-a rorellai ZPM Party chuan chiang taka hnehna changin Ward 19-a Inthlanna neih ah Ward 17-ah hnehna an chang a, ZMC-a rorellai MNF Party chuan Ward pakhat-ah hnehna changin Congress Party pawhin Ward pakhat-ah hnehna an chang a ni. AMC Inthlanpui-a Party mal-a sawrkar siam thei khawpa hnehna chang ZPM Party hian MNF chakna Ward No. IX leh Congress Party chakna XIX tih loh Ward zawng zawngah hnehna chang vekin Ward 19 zinga Hmeichhia te tana Seat hauh (Reserved Seat) paruk an lak vek bakah General Ward-ah hmeichhe pahnih an tling a ni.

Ward No. I (Durtlang, Leitan, Durtlang North, Selesih, Zuangtui leh Muanna Veng)-ah ZPM Candidate Vanlalhriata chuan vote 4,141 hmuin hnehna a chang a, amah hnaih bertu CL. Biakhlua (MNF) chu vote 1,586 in a hneh a. Ward No. II (Chaltlang, Lily Veng, Bawngkawn leh Bawngkawn South)-ah ZPM Candidate R. Lalmawipuii'n vote 4116 hmuin hnehna a chang a, amah hnaih bertu K. Lalnunpuii (MNF) aiin vote 1,876 in a hmu tam zawk a ni. Ward No. III (Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlang)-ah ZPM Candidate Vanlalfaka chu vote 4116 hmuin amah hnaih bertu K.Romawia (MNF) chu vote 1,876 in a hneh a ni.

Ward No. IV (Ramhlun South, Ramthar Veng, Ramthar North leh Aizawl Venglai)-ah ZPM Candidate Vanlalhriatrengi chuan vote 4,282 hmuin amah hnaih bertu R. Lalnunthari (MNF) chu vote 2121 in a hneh a. Ward No. V (Chanmari, Zarkawt leh Electric Veng)-ah ZPM Candidate Dr. Lallawmkimi chuan vote 3306 hmuin amah hnaih bertu Abishag Vantluangpuii Ralte (MNF) chu vote 1,640 in a hneh a ni.

Ward No. VI (Chanmari West, Edenthar leh Hunthar)-ah ZPM Candidate H. Lalrem-tluanga chuan vote 2,513 hmuin amah hnaih bertu Lalhmangaiha Renthlei (MNF) chu vote 1,337-in a hneh a. Ward No. VII (Zemabawk, Zemabawk North, Falkland leh Thuampui)-ah ZPM Candidate Zochhuana'n vote 4492 hmuin amah hnaih bertu Vanlalneia (MNF) chu vote 605-in a hneh a. Ward No. VIII (Armed Veng, Armed Veng South leh Chite Veng)-ah ZPM Candidate Christina Roluahpuii Sailo chuan vote 2699 hmuin amah hnaih bertu Lalbiakthuama (MNF) chu vote 1,379-a hnehin a tling nawn bawk.

Ward No. IX (Dawrpui, Saron Veng, Chhinga Veng leh Tuithiang)-ah MNF Candidate B. Lalawmpuii chuan vote 3140 hmuin a zawnin Term 3-na atan thlantlin leh a ni a, amah hnaih bertu Zoramchhana (ZPM) chu vote 118 in a hneh a. Ward No. X (Chawnpui, Zotlang, Zonuam leh Ainawn)-ah ZPM Candidate PB. Lallawmzuala'n vote 3694 hmuin amah hnaih bertu V. Thangzawna (INC) chu vote 1953-in a hneh bawk. Ward No. XI (Luangmual, Chawlhhmun, Tanhril, Tuivamit, Rangvamual, Phunchawng leh Sakawrtuichhun)-ah ZPM Candidate Helen Rualchhingi chuan vote 4,875 hmuin amah hnaih bertu Varthannguri Sailo (MNF) chu vote 1909-in a hneh a. Ward No. XII (Tuikual North, Tuikual South leh Dinthar)-ah ZPM Candidate C. Vanlalhruaii'n vote 4368 hmuin amah hnaih bertu C. Vanlalchanchinmawii (MNF) chu vote 777-in a hneh a bawk.

Ward No. XIII (Dawrpui Vengthar, Vai-vakawn leh Kanan Veng)-ah ZPM Candidate Vanlalhruaia chuan hnehna changin vote 2627 a hmu a, amah hnaih bertu Lalfakzuala Chenkual (MNF) chu vote 131 in a hneh a ni.  Ward No. XIV (Khatla, Khatla South, Khatla East leh Mission Vengthlang)-ah ZPM Candidate Roy Lalhriatpuia chuan vote 3,343 hmuin hnehna a chang a, amah hnaih bertu Hmingthansanga (MNF) chu vote 1,341-in a hneh a. Ward No. XV (Bung-kawn, Maubawk, Bungkawn Vengthar, Nursery Veng leh Lawipui)-ah ZPM Candidate VL. Zamlova'n hnehna changin vote 2955 a hmu a, amah hnaih bertu Term hnih chhung he Ward-a Corporator nihna lo chelh tawh Zodingpuii (INC) chu Vote 391 in a hneh a ni.

Ward No. XVI (Bethlehem Veng, Be-thlehem Vengthlang leh College Veng)-ah ZPM Candidate R. Lalawmpuii'n vote 3768 hmuin hnehna a chang a, amah hnaih bertu Vanlalhmachhuana (MNF) chu vote 1187 in a hneh a. Ward No. XVII (Venghlui, Republic Veng, Republic Veng-thlang leh Upper Republic)-ah ZPM Candidate Lalremruati Sailo chuan vote 2,698 hmuin amah hnaih bertu C.Rosangpuii (MNF) chu vote 802-in a hneh bawk.

Ward No. XVIII (Mission Veng, Thakthing Veng, Venghnuai, Salem Veng, ITI Veng, Dam Veng Tuikhuahtlang leh Model Veng)-ah ZPM Candidate K.Lalrodinga chuan vote 5389 hmuin hnehna a chang a, amah hnaih bertu Lalrina Renthlei (MNF) chu vote 2,028 in a hneh a. Ward No. XIX (Kulikawn, Tlangnuam, Hlimen, Mel-thum, Saikhamakawn leh Tlangnuam Vengthar-ah INC Candidate leh MPCC Treasurer nilai Dr. Lalmalsawma Nghaka chuan vote 4607 hmuin thlantlin a ni a, amah hnaih bertu Dr. C. Malsawmtluangi (ZPM) chu vote 1,021-in a hneh bawk a ni.