MZP in HSLC Exam-a zirlai tithate an chawimawi

Mizo Zirlai Pawl (MZP) General Hqrs. chuan High School Leaving Certificate (HSLC) Exam 2026 result chhuaka Top 10-a lang Mizo zirlai mi 18 te hnenah nimin khan chawimawina an hlan.

Aizawl Vanapa Hall-a MZP in HSLC-a zirlai tithate an chawimawina hun hi School Education Minister Dr. Vanlalthlana chuan khuallian nia hmanpuiin Zirlai te chu zirlai an nih chhunga an hlawhtlinna chan chhan chu an nu leh pa, zirtirtute leh khawtlang hruaitute tawngtaisakna a ni tih hriaa, chung an tana theihtawp lo chhuahtute chu hre reng turin a chah a, “Kan hriat loh ni la la in kan tlahniam dawn a ni",” a ti a. Zirlaite chu Textbook piah lam an thiam a ngaih thu leh by-heart system a kal lova an thiamna tak tak pawchhuak thei tura zir tura fuihin, “Question pattern a danglam chho zel dawn a, chumi mil chuan in inher rem chhoh ve zel a ngai dawn a, in thiamna tak tak lan theihna tur Question kan rawn buatsaih chho zel dawn a ni,” a ti.

He hunah hian MZP General Hqrs. President Dr. C. Lalremruata chuan Mizoram Sawrkarin kumin atangin HSLC result bu-ah Ranking leh Division te tarlan tawhloh nise tih chu MZP chuan Mizo Zirlaite zingah inelna thianghlim a awm theihna atan tarlan ngei nise an duh tih sawiin, “Mi thenkhat ten MZP ten kumtin-a an lo tih thin Top 10 chawimawi theihloh dawn avanga duhlo anga min ngaihna hi thudiklo a ni,” a ti a. “MZP chuan zirna kawnga hma kan sawn theih nan Question pattern leh Exam System bakah kan Syllabus te siamtha in midang te el pha ve tura hmalakna hi zirna kawnga hma kan sawnna atan chuan hmalakna hmasa turah kan ngai a. Nakum lam atang chuan Sawrkar thuneitute pawh Mizo Zirlaite zingah inelna thianghlim zawk a awm theih nan kum lo la kal leh zel turah pawh Result Bu-a Top 10 leh Division tarlang ngei turin kan ngen nawn leh,” tiin kumin result-a Govt. School fail an awmlo hi hmasawnna ropui tak a nih thu a sawi bawk.

MZP President chuan Zirtirtu indaihlo te, mahni post-a awm tha duhlo te, attach tam lutuk te chu MZP chuan a ngaimawh hle tih sawiin, “Zirna kan ngaih pawimawh ber tur a nih laiin leh Mizoram khawtinah School te kan neih vek avangin zirna kaihhnawih bik khawitu tur 'Mizoram Education Service' neih vat hi MZP chuan ngaiin a hria,” a ti bawk.

MZP ten kumin HSLC Top 10-a lang Mizo zirlaite chawimawina hun an buatsaih ah hian zirlai mi 18 te hnenah chawimawina hlan a ni a, a pumpui-a titha ber chu Rachel Biakthapari d/o Salai Chan Uk niin St. Joseph HSS-a zirlai a ni a, heng mi 18 zingah hian St. Joseph HSS zirlai mi 6 awmin School mal-ah an tam ber a, St. Pauls HSS atangin zirlai 5 leh Mt. Carmel School atangin zirlai pathum bakah Living Water School, Divine Intervention School, Holy Faith School leh CLS Academy atangin zirlai pakhat theuh an tel bawk a ni.