MSPMC in an rawtna ngaipawimawh lo Department hotu insawifiah tura koh thin an rel

Mizoram State Project Monitoring Committee (MSPMC) chuan nimin khan General Body Meeting vawi 8-na neiin an Project endikte umzui dan tur an rawtna ngaipawimawh lo Department hotulu ber te chu insawifiah tura koh thin tawh nise an ti.

Mizoram State Project Monitoring Committee General Body Meeting hi Planning & Programme Implementation Department Conference Hall-ah neiin Chief Minister Lalduhoma chuan MSPMC hmalakna te chuan rah tha a chhuah nasa tih sawiin, Memberte lawmthu a hrilh bakah taima taka thawk chhunzawm zel turin a chah a. Hmasawnna hna hi chak takin kal se an duh avangin Project Work kalkawng an ti tawi tih sawiin, “Tunhma chuan Department ten Finance-ah Allocation an rawn dil a, rei tak file a kal a, chumi zawhah Administrative Approval an rawn dil leh a, rei tawk tak file a kal leh a. A dawtah Expenditure Sanction an rawn dil leh a, rei tawk tak bawk hun a kal leh a. A tak taka hna kan tan theih hun a tlai thin. Tunah chuan Secretary ten an Department Project Administrative Approval leh Expenditure Sanction an lo pek ve theih dan tur kan duang ta a. Hei hian nasa takin hmasawnna hnathawh a ti chak dawn a ni,” a ti.

MSPMC hian sawrkar kum kalta 2025-26 chhung khan Project 82 an endik a, an zinga 66 chu project thar niin nikum hmasa lama an lo tlawh tawh an tlawh nawn Project 16 a awm bawk a. An Project endik zara hmasawnna lo lang chhuakte he hunah hian tarlan a ni.

MSPMC General Body Meeting-ah hian tun sawrkar kum thara project endik dan kalphung tha zawk tur nia an ngaihte an sawiho a. Field Visits neih chin tur thliar fel dan ruahmanna an siam a. An hmalakna zau zawka puanchhuah dan tur leh Media mite nena thawhhona tha zawk neih dan tur an ruahman a. An project endikte umzui dan tur an rawtna, a mawhphurtu (concern) Department-a an thlen ten ngaih pawimawh a hlawh leh zual theih dan tur pawh sawiin; an thurawn ngaipawimawh lo Department te chu an hotulu ber te Committee hmaa insawifiah tura koh thin tawh nise an ti a. Chumi hnua la bawhzui tha lo te chu an chunga hremna (action) la tura sawrkara thlen zel nise an ti a ni.

Heng bakah hian MSPMC hian tuihna a lo pun theih nan CAMPA Fund hmanga hmun thlan bik thenkhata Afforestation kalpui dan dap tha an ti a. Annual Report 2025-26 siam leh tur niin MSPMC pualin portal neih ve ni se an ti bawk.