Bawrhsap hovin khawtlang chei dan tur sawiho a ni
Serchhip DC Meeting Hall-a thutkhawm ah hian sawrkar Official te bakah P&E Village Council te, KPP Intawhkhawm Organizing Committee hruaitute leh Town Development Committee hruaitute telin Serchhip khawchhung tih hmasawnna tur leh kumin October thlaa P&E Veng Leisekawt Mual-a Serchhip in Rampum Huap Kohhran Pavalai Pawl (KPP) Intawh-khawm a thlen hun mikhualte tana nuam zawka hmunhma buatsaih dan tur hrang hrangte sawiho a ni a. Serchhip DC Office-a Superintendent, F. Lallawmkima chuan hemi atana Leisekawt Mual an endikna leh ruahmanna an siam hrang hrang te a tarlang a ni.
Nimin-a thutkhawm ah hian mipuite’n zan thimah pawh him zawk leh hahdam zawka Leisekawt Mual an thlen theih nana Serchhip IOC Veng leh Bazar Veng inkar-ah kawng tih enna (Street light) vuah belh chungchang te, Pavilion chei that dan tur chungchang te, Pavilion bula Vantlang Inthiarna chei that dan turte leh Tennis Court bula inthiarna siam belh chungchangte, BDO quarters thlang zawla chawlh hahdamna lailawk siam chungchangte rel a ni a; Field hungna lungremte pawh mawi zawka rawng hnawiha chei thar tum a ni bawk.
He thutkhawm ah hian Bawrhsap Paul L. Khuma chuan heng hmalaknate hi Serchhip khua tana hmasawnna pawimawh tak a nih avangin chak taka bawhzui a nih tur thu a sawi a. Khaw-tlang hruaitute leh Pavalai hruaitute pawhin sawrkar hmalakna leh thawhpuinaahte lawmthu sawiin, khawtlang hmasawnna atana hmalakna hrang hrangahte theihtawp chhuaha thlawp zel an inhuam thu an sawi bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!