Thli tleh vangin Tui leh Eng pekna ah harsatna thleng

Tunhnaia ruahsur leh thli tleh avangin Serchhip-ah tui pump theih a ni lo a, Eng pekna chhia engemaw zat awmin siamthat hna thawh mek a ni.
Tunhnaia thli tleh hian Tuikum lui-a PHE Pump House-a Electric pekna line chu a tichhia a, hei vang hian Serchhip mipuite chawmna atana Tui pump hna chu khaihlakin Thawhtanni atang khan mipuite hnena Tui sem a khaihlak a, Electric Line chhia siamthat hna hi ngawrh taka thawh mek niin PHE Department hotute chuan mipuite chu ruahtui khawl kawngah theihtawp chhuah turin an chah a ni.

Tun tuma thli tleh hian Serchhip Veng hrang hranga Eng pekna line a tichhe nasa hle a, Serchhip khawpui chhung bakah Serchhip atanga Eng pek khaw hrang hrangah line chhia a awm a, heng te hi P&E Department chuan a theih ang anga siamthat hna thawkin nimin lam khan Serchhip khawpui chu Dan pangngaia Eng pek theih a ni hlawm a, nizan lam thleng khan Eng pekna tha lo hi buaipui a la ni. Eng pekna that loh avang hian ni hnih (2) chhung LENKAWL kan print thei lo a, kan chanchinbu min laksaktute hriatthiamna kan ngen e.