AMC inthlanpui neih ah Vote zaa 61.14 tlain April 27-ah Vote tla te chhiar a ni ang

Aizawl Municipal Corporation (AMC) Inthlanpui atan nimin khan tluang taka Vote thlak niin thil duhawm lo thleng a awm hriat a ni lo a. He Inthlanna ah hian hriat theih chinah Vote za zela 61.14 tlain Vote tla tla te hi karleh Thawhtanni, April 27 khian chhiar a ni ang.
Aizawl Municipal Corporation (AMC) Inthlanpui vawi 4-na atan hian nimin khan Ward 19-ah mipui ten Vote thlakin zing dar 7:00 khan atangin Polling Station hrang hrang 264-ah Vote thlak tan a ni a, Polling Station tam zawk chuan a hun takah Vote thlak hi tanin engemaw harsatna awm avanga dar 7:00-a Vote thlak tan thei chiah lo awm bawk mah se tluang taka Vote thlak chhunzawm theih a ni. Nimin-a AMC inthlan ah hian chawhma lamah Vote tla hi tha vak lovin chhun dar 12:00 thleng khan Vote 37.04% a tla hman a, nimin tlai dar 5:00 thleng khan Vote thlakna hun hi hawngin Polling Station thenkhat ah Vote thlak zo hman chiah lo awm mah se nizan dar 6:30 vel khan Polling Station tinah hian Vote hi an thlak zo nia hriat a ni a, hriat theih chinah Vote tla hi za zel 61.14 a tling a, hei ai hian Vote tla hi la tha tura beisei ni mah se Inthlanpui hnuhnung bera Vote tla erawh a phak rih lo a. AMC inthlan hnuhnung ber kum 2021-a neih ah khan Vote za zela 63.49 a tla a ni.

Hriat theih chinah tun tum AMC inthlan ah hian Vote nei mipa 1,10,335 zinga 66,415 ten Vote thlakin Vote nei hmeichhia 1,29,650 zinga 80,304 ten Vote an thlak bawk a. Ward 19-ah hian Vote zaa 70 tlak phakna awm lovin a tlak thatna ber Ward No. XIX-ah 67.22% a tla a, a tlak chhiatna ber Ward No. II-ah 50.52% a tla bawk a. Vote zaa 50 leh 60 inkar tlakna Ward panga awmin zaa 60 aia tam tlakna Ward 14 a awm bawk a. Vote zaa 40 tlak phak lohna Polling Station pakhat a awm bawk.

AMC Inthlanna a Vote thlakna khawl te hi nizan khan venhimna hnuaiah dah nghal a ni a, ruahman lawk ang chuan karleh Thawhtanni, April 27, 2026 zing dar 8:00 atang khian Vote tla te hi chhiar a ni ang.