Mizo Students’ Union (MSU) Silver Jubilee lawmna Chief Minister hovin neih a ni

Mizo Students’ Union (MSU) kum 25-na, Silver Jubilee lawmna chu nimin khan Dawrpui Multipurpose Hall-ah neih niin Chief Minister Lalduhoma chuan khuallian niin a hmanpui.

MSU Silver Jubilee lawmna ah hian Chief Minister chuan Silver Jubilee lungphun hawnga Souvenir tlangzarhin MSU in kum 25 a tling chu a lawmpui thu a sawi a. Kan ramah NGO kan ngah thu leh a nei tha ber pawl kan nih thu sawiin, “Pawl hruaitute hian pawl thiltum sirah mahni hamhaina an lo kalpui lutuk hian thil fel lo a lo chhuak mai thin,” tiin thiltum tha tak nei pawl an nih ang ngeiin an thiltumte ti hlawhtling tura theihtawp chhuah zel turin a ngen a. “Party leh party inkara thu inchuh a awm lai phei chuan NGO ten ngawih an chuh thiamte pawh hi a tha fo. Kan tih tur leh kan tih loh tur hriat hi pawl zahawmna a ni,” a ti. Kan zirlai pawl te chu Hnam inpumkhatna kawngah an thawhhlawk tih pawh Chief Minister chuan sawiin, “Tunhnaiah pawh Manipur-a Mizo nih duh ngai lo kan unau tam takten Mizo an nihna pawmin Mizo Integration Council te an din a. Mizo chhunga hnam peng hrang hrangte tawng hmang hian Mizo tawng thar tam tak a indin chho mek a. A hlu hle a ni. Chin Hills lamah pawh kan inunauna hi sawi tam a tul hle a. Mizote hi inpumkhat tura buatsaih mek kan ni,” a ti bawk.

Hun rei tak atang tawhin MSU hruaitute chuan sawrkarah zirlaite Study Tour Budget ti sang tura an ngen thin thu leh kumin Budget-ah sawrkar chuan zirlaite Study Tour Budget hi a leta ti pungin cheng nuai za a dah thu sawiin, Zirlai tam zawkte Study Tour-in an kal chhuak thei tawh dawn tih a sawi a. MSU Office hmun tur an dap thin ah sawrkar chuan Ainawn Veng lamah an hmunhma tur an teh fel thlap tawh tih a sawi bawk.

Nimin-a MSU Silver Jubilee lawmna hunah hian khual zahawm Minister B. Lalchhanzova pawhin MSU te a lawmpui thu sawiin, Mizoram mipui kan pun chak theih nan puitling taka nun hmang a, nupui pasal nei hma turin a chah a. MSU President B. Lalkhawngaihzuala pawhin an pawl hmalakna leh ngaih pawimawh thil tha tam tak sawrkar in a tih sak thu sawiin, lawmthu a sawi bawk a ni.

Mizo Students' Union (MSU) hi kum 1981 khan R. Vanlawma hova din a lo ni tawh a, mumal takin rei tak a kal lova. Kum 2001 February thlaah din thar leh niin registration pawimawhte neih fel niin tun thlengin ala ding ta zel a. A din kumah pawh kum 2001 zawk hi pawmin kumin ah Silver Jubilee an lawm ta a ni. Silver Jubilee lawmna hi kumin February thla khan a hawnna neih a ni a, intihsiakna leh programme hrang hrangte an buatsaih a, heng intihsiakna a lawmman te hi nimin khan sem nghal a ni bawk. MSU hian Mizoram chhung leh pawnah branch (establishments) hi 110 an nei mek a ni.