Serchhip-ah Kutziak hlui zawn chhuah leh vawnthat kawnga hmalakna bawhzui dan tur sawiho

Nimin khan Serchhip-ah District Level Committee on Gyan Bharatam Mission chu thukhawmin Ministry of Culture kaltlanga India ram pum huapa kutziak (manuscript) hluite zawnchhuah leh vawn that (digitalized) kawnga hmalak mek chungchang an sawiho.
He thutkhawm Serchhip DC Meeting Hall-a neih hi Bawrhsap Paul L. Khuma chuan kaihruaiin Aizawl atanga Art & Culture Department aiawha rawn kal C. Lalmuanpuia chuan Gyan Bharatam Mission thil tum sawiin, pi leh pute sulhnu, an kutziak (khawlchhut ni lo) hrang hrangte a riral mai loh a, vawnthat tlat an nih theihna tura hmalakna a nih thu a sawi a, tunah hian ‘zawn chhuah’ (identification) hna thawh mek a nih thu leh awlsam zawka he hna thawhna tur atan hian ‘Gyan Bharatam Mobile Application’ siam a nih thu sawiin, mi tu pawh, mimal leh pawl emaw, thu ziak hlui report tur neite chuan he Mobile Application kaltlang hian an thehluh theih vek thu a sawi a. Mipuite’n he Application hi an hmelhriattlan deuh deuh a pawimawh thu sawiin, heng Manuscript-te hi a neitute remtihna thlapin uluk taka thla lak a, a Soft Copy chauh vawnhim tura lak tur niin, a tak (original) chu a neitute kutah a awm zui zel tur thu a sawi bawk a. Tun dinhmunah Mizoram chuan Mobile Application kaltlang hian Survey Request 2 leh Manuscript 28 nei mekin, NE State-ah Manuscript report la nei tlem ber kan nih thu a sawi a, report tam zawk nei tura tan lak a ngaih thu a sawi bawk.

He thutkhawmah hian Serchhip khaw chanchin hria leh thu leh hla lam hriat ngah tur Govt. Serchhip College Principal hlui, Lalhmangaiha Chawngthu bakah Govt. Serchhip College-a thawk lai Assistant Professor pahnih K. Lalrinchhana leh Laldinpuia te an tel bawk a. Hmalak dan tur hrang hrangte sawiho a nih hnuin Bawrhsap Paul L. Khuma chuan Mizote thu ziak hlui zawnchhuah hna thawk tur hian Serchhip District-a khaw hrang hranga khawtlang hruaitute leh sawrkar hotute nen thawhhona tha neih a pawimawh tur thu leh chak taka hma lak zui a nih tur thu sawiin hun hi a khar a ni.

Gyan Bharatam Mission hi kum 2025 – 2031 inkar chhunga kalpui tur a ni dawn a. Mizoram-ah State Level Committee leh District Level Committee te chu April 1, 2026 khan din ni tawhin, Art & Culture Department chu State Nodal Department a ni a. Tunah hian District tinah Awareness Campaign hna thawkin an fehchhuak mek a ni.