East Lungdar-ah Poshan Pakhwada-ECCE Festival hman a ni

Nimin khan East Lungdar ICDS Project buatsaihin East Lungdar Futsal Ground-ah Early Childhood Care and Education (ECCE) Festival hman a ni.
Nimin-a he hun hman hi East Lungdar BDO Marilyn Lalruatkimi chuan hmanpuiin kum 6 tlin hma hi naupangte thluak leh taksa than chak lai ber, an hmalam hun hriltu 'lungphum pawimawh' a nih thu a sawi a. “Heng hun chhunga enkawlna leh kaihhruaina dik (ECCE) an dawn chuan thiamna leh hriselna mai bakah, mi dangte nena khawsak ho dan (social skills) thlengin an thiamin nasa takin an thanlen zelnaah pawh hma an sawn phah thei a ni,” a ti. He hunah hian East Lungdar ICDS Project-a Circle Officer Jeremy Lalhmingsanga chuan he hun an hman chhan tlangpui te a sawi a, he Festival hi Poshan Pakhwada nen hman kawp niin naute, nute leh naupang enkawl dan leh eitur hrisel (balanced diet) pek pawimawh zia chungchangte leh thil pawimawh chi hrang hrangte inzirtirna hun atan hman a ni.