Vawiin ah District Cricket inelna khelh tan a ni dawn

Cricket Association of Mizoram (CAM) in an buatsaih ‘5th Inter-District Cricket Tournament’ chu Vawiin hian Serchhip-ah khelh tan a ni dawn a, Inrinni khian Final khela zawhfel hman tum a ni.
Mizoram-a District pariat te inelna tur Tournament hi nizan khan Serchhip Kawnpui VC Hall-ah a hawnna neih niin Serchhip Bawrhsap, Paul L. Khuma chuan a hawng a, tun tum hi Serchhip in he inelna a thlen tum hnihna tur niin District 8 atangin Team an rawn kal dawn a ni. He Tournament hi Serchhip Sports Complex-ah leh DC Playground, Khawtetlang-ah khelh tura ruahman a ni a, Group A-ah Siaha, Lunglei, Champhai leh Hnahthial DCA te awmin Group B-ah Kolasib, Serchhip, Saitual leh Mamit DCA te an awm bawk a, Group pakhat-a awm te zel hi an inhmachhawn kual hnuah point hmu sang pahnih ve ve ten Semi Final an khel dawn a ni.

Vawiin hian inkhel pali a awm dawn a, Serchhip Sports Complex-ah chawhma dar 9:30 ah Lunglei DCA leh Hnahthial DCA inhmachhawnin chawhnu dar 1:00-ah Serchhip DCA leh Saitual DCA an inhmachhawn anga. DC Playground-ah chawhma dar 9:30-ah Kolasib DCA leh Mamit DCA inhmachawnin chawhnu dar 1:00-ah Champhai DCA leh Siaha DCA an inhmachhawn dawn bawk a ni.