Cooperation Department, NABARD leh Apex Bank hotute'n Mizoram Larsap an kawm

Zonuna Kawlni /

Cooperation Department, National Bank for Agriculture and Rural Development (NABARD) leh Mizoram Cooperative Apex Bank (MCAB) Ltd., hotute chuan nimin khan Larsap, General (Dr) Vijay Kumar Singh chu Lok Bhavan-ah hmuin tunhnaia ‘Scheduled Bank’ dinhmuna Mizoram Cooperative Apex Bank (MCAB) Ltd. hlankai anih chungchang bakah hmalakna dangte an sawipui.

He hunah hian Larsap General (Dr) Vijay Kumar Singh chuan Mizoram Cooperative Apex Bank Ltd. in Scheduled Bank dinhmun pawimawh tak a thleng thei chu a lawmpui thu sawiin, Scheduled Bank an nih tawh avangin State Sawrkar hnuaia Department-te pawhin dan ang taka an dawr theih tawh dawn thu a sawi a. Cooperative Bank-te chu mipui nawlpui tana dawr theih an nih avangin tun aia hmasawn lehzual tura theihtawp chhuah turin a chah a ni.

Mizoram chuan Banking Sector-ah bung thar kaiin tunhnaiah Mizoram Cooperative Apex Bank Ltd. chuan ‘Scheduled Bank’ Status a hmu thar a. Gazette of India, April ni 15, 2026-a tarlan a nih danin Mizoram Cooperative Apex Bank Ltd. chu Second Schedule of Reserve Bank of India Act, 1934-ah telh a ni dawn ta a ni.

Mizoram Cooperative Apex Bank Ltd. hi July 31, 1982 khan din a ni a. Tun dinhmunah Branch 35 leh ATM 45 a nei mek a. Deposit cheng vbc. 1930 neiin, Loan cheng vbc. 1272 an pechhuak a, sum dahluh leh loan pek chhuah khaikhinna Credit-Deposit (CD) ratio chu 66% a ni a, Mizorama Bank-te zinga loan pechhuak tha berte zinga mi a ni mek bawk a ni.

Nimin-a Governor an hmuhna ah hian Cooperation Department-a Commissioner & Secretary Udit Prakash Rai leh Registrar of Cooperative Societies (RCS) John LT. Sanga bakah NABARD-a General Manager Pankaja Borah leh MCAB atangin Chairman Lalnunsanga leh hotu dangte an tel a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »