AMC Inthlan-ah Vote a tla tha thawkhat ah ngaih a ni

Mizoram State Election Commissioner Dr. H. Lalthlangliana chuan duhthusam ang thlap ni lo mah se Aizawl Municipal Corporation (AMC) Inthlan-a Vote tla zat zaa 62.77 chu a tha thawkhat tih a sawi.

Niminpiah-a AMC Inthlanna a Vote thlak chungchanga zawhna chhangin Mizoram State Election Commissioner Dr. H. Lalthlangliana chuan Home Voting te nen an belhkhawm hnuah AMC inthlan-a vote tla zat chu zaa 62.77 a ni tih sawiin, tun tumah hian Election Commission of India hnuaia Duty vangin sipai tam tak an zin chhuak a, anni tan hian Postal Ballot a vote thlak theih a ni si lo a, hei hi vote thlak lo an tam chhan niin a sawi a, AMC chu ECI nen an inzawm loh avangin Postal Ballot hi sipai tan hman theih a ni lo tih a sawi bawk.

Dr. H. Lalthlangliana chuan niminpiah-a Vote thlak lai khan Aizawl khawpui hmun hrang hrang an tlawh kual thu leh an beisei phak bakin Mizoram People Forum (MPF) puihna an dawng tha tih sawiin, anni zarah boruak muanawm tak hnuaiah inthlan a nih thu a sawi a. He Inthlanna a Vote chhiar hun karleh, April ni 27-ah vote chhiar hun pawhfan anih chhan chu Mizorama Kohhran lian ber Presbyterian Kohhran Bial Inkhawmpui tibuai lo tura ruahman a ni tih a sawi a, tunkar tawpa Bial Inkhawmpui a zawh chuan Kohhran ti buai lovin Vote an chhiar thei dawn niin a sawi bawk.

Aizawl Municipal Corporation (AMC) inthlan ah vote za zela 62.77% a tla a. Polling Station a vote tla zawng zawng zat chu za zela 61.14 niin Home Voting leh PED vote thlak nen a vaiin za zela 62.77 a tla a. AMC inthlan hi AMC inthlan vawi thum lo neih tawh te nena khaikhinin tun tuma inthlan ah hian vote a tla tlem ber a, kum 2010 khan vote zaa 63.60 tlain kum 2015 khan zaa 63.55% vote a tla a, kum 2021-ah vote zaa 64.19 tlain tun tumah 62.77% a tla a ni.