Kolasib Bawrhsap in District chhung tlawh mek

Kolasib District Bawrhsap thar H. Dolianbuaia chuan nimin leh niminpiah khan an District chhunga sawrkar hmun pawimawh leh ramri te tlawhin an dinhmun a enfiah.

Kolasib Bawrhsap hian nimin khan an District chhunga National Highway Four Lane laih mek chu Vairengte thleng tlawhin NHIDCL hotuten an hnathawh mek kalphung leh hmasawn dan te lo hrilhfiah in, an mamawh leh hna chak zawka an kalpui theihna tur te an lo thlen a. Bawrhsap chuan ram leh mipuite tana ram ro tling tur hmasawnna ruhrel thawk an nih angin mipuite hmakhua ngaihtuah chunga theihtawp chhuah zel turin a fuih a. Hnathawktute pawhin a hma thei ang bera hna peihfel an tum thu leh theihtawp an chhuah thu an lo hrilh a. Four Lane siamna daltu hrang hrang Arbitration leh Court Case te pawh a rang lama chinfel thuai a nih theih nan anmahni zawn theuh ah CALA Kolasib leh NHIDCL te chu ngaihtuahna seng thar turin a chah bawk.

Hemi hnu hian 3rd Battalion MAP tlawhin ramri venhimna (border security) chungchang leh an mamawhte a sawipui a. 1st Battalion IR, Vairengte tlawh chhunzawm lehin an Camp mamawh leh thil pawimawh hrang hrangte an sawiho a. Assam leh Mizoram ramri-a 5th Battalion IR duty te awmna hmun, Sabual pawh tlawhin, ramri a buaina leh harsatna an tawh thin te sawiho a ni a. Bawrhsap chuan ramri vengtute inpekna a fak thu sawiin, huaisen leh taima taka hna thawk zawm zel turin a fuih nghal bawk.

Bawrhsap hian Vairengte Community Health Centre (CHC) tlawhin, Doctor leh Nurse te a kawm a, Vairengte CHC-ah hian Medical Officer pakhat (1), AYUSH Doctor pahnih (2), Dental Surgeon pakhat leh thawktu (Staff) dangte an awm mek a. Bilkhawthlir-a Eklavya Model Residential School tlawh lehin, he hmunah hian zirlai pawl 6 atanga pawl 9 mi zahnih chuang an awm a, Bawrhsap hian School naupangte leh zirtirtute fuihna thu sawiin Bilkhawthlir-a BDO Office pawh a tlawh zui bawk.

Hemi hma niminpiah khan Kolasib Bawrhsap hian Thingdawl-a Nursing School chu tlawh thawhin an School dinhmun leh harsatna an neih hrang hrangte a lo enpui tawh a, hei bakah hian National Highway kawng laitu te chu tlawhin thosilen 75 a sem a, Kawnpui Primary Health Centre (PHC) pawh tlawhin thawktute a kawm bakah an mamawh te a ngaihthlak sak a. Hemi hnu hian Kawnpui SDO (Civil) Office tlawhin, SDO (Civil) leh thawktute nen Office thuamthat dan tur leh tihchangtlun theih dan tur te sawiho bawk a. Mualvum-a 1st IR Battalion Headquarters tlawh lehin, Commandant te nen Battalion hmuna Security, Infrastructure leh hmasawnna tur tlangpui te an sawiho nghal bawk a ni.