Mizoram-a khualzin te rei zawk chamtir tum a ni

Tourism Minister Lalnghinglova Hmar chuan Mizoram tlawhtute rei zawk an châm theihna’n an tlawh tur leh tihtur tam zawk buatsaih kawngah hma an lak mek thu a sawi.

Kumin October thlaa Mizoram-a Tourism Conclave neih tur leh chumi inbuatsaih nan a New Delhi-a Pre-Conclave Meeting neih tur chungchang ah nimin khan Tourism Minister Lalnghinglova Hmar leh NITI Aayog Officer te chu Chanakyapuri, New Delhi-a Mizoram House-ah an inkawm a, he hunah hian Tourism Minister chuan Sairang thleng Rel a luh hnuah Mizoram tlawhtu an pung nasa tih sawiin, “Sairang thleng Rel a luh hnuah Mizoram tlawhtu chu chawhrualin thlakhatah nuai khat an chuang tawh a, Thlawhtheihna leh Rel-a inkalpawhna a awlsam tawh avangin an pun zel kan ring. India rama Thlasik khawpui (Winter Capital of India) ni thei turin hma kan la mek a, Mizoram tlawhtute rei zawk an châm theihna’n an tlawh tur leh tihtur tam zawk buatsaih kawngah hmalakna a kal mek a ni,” a ti.

Nimin-a thukhawm hian ‘Pre-Conclave Meeting’ chu May, 2026-ah Vigyan Bhawan, New Delhi-ah neih nise tiin NITI Aayog leh Mizoram sawrkar thawhho dan tur leh meeting neih tur kaihhnawiha mawhphurhna hrang hrang insem dan turte sawiho a ni a. Pre-Conclave ah hian Mizoram hmasawnna tur uluk taka ngaihtuahin, India rama Tourism kaihhnawih industry langsar leh stakeholder dangte nen ‘brainstorming’ neih a ni ang a, chuta tanga hmalakna tur lo langte chu October-a Mizoram Tourism Conclave neih hunah a taka kalpui turin ruahmanna siam nise tih a ni.